Գյուլը` Հոլանդիայում, հակաթուրքական տրամադրություններ

Քաղաքական13:04, 17 Ապրիլ 2012

Գյուլը` Հոլանդիայում, հակաթուրքական տրամադրություններ

Ինչպես և ծրագրված էր, ապրիլի 17-ին մեկնարկել է Թուրքիայի նախագահ Աբդուլլահ Գյուլի եռօրյա պաշտոնական այցը Հոլանդիա: Այցի տոնական առիթը թուրք-հոլանդական հարաբերությունների 400-ամյակն է: Մայրաքաղաք Ամստերդամում Գյուլին ընդունել է թագուհի Բեատրիսը: Այնուհետև Գյուլը հանդիպել է Հոլանդիայի վարչապետ Մարք Ռութի և պաշտոնատար այլ անձանց հետ:

«Firatnews» լրատվական գործակալության տեղեկացմամբ` Հոլանդիայում բնակվող թուրքերը առաձնապես մեծ հետաքրքրություն չեն ցուցաբերել Թուրքիայի նախագահի այցի նկատմամբ, և ազգությամբ շատ քիչ թվով թուրքեր են ներկա եղել Դամ հրապարակո կազմակերպված ընդունելության արարողությանը:

Նշվում է, որ նախագահ Գյուլի այցը ոստիկանության և անվտանգության ուժերի ձեռնարկած միջոցների ներքո է մեկնարկել: Օրինակ` ոստիկանները չեն թույլատրել Հոլանդիայի խորհրդարանի շենքի դիմաց բողոքի հանրահավաք կազմակերպել ընդդեմ Գյուլի այցի: Մինչդեռ նախօրեին «Հոլանդիայում հայկական կազմակերպությունների դաշինքը»` FAON, «Հոլանդիայում քրդական միությունների ֆեդերացիան»` FED-KOM, «Ժողովրդավարության ասորական կազմակերպությունը»` ADO) և «Հոլանդիայի թուրք բանվորների դաշնությունը» տարածել էին հաղորդագրություն` հետևյալ վերնագրով «400 տարվա մշակութային ժառանգության ոչնչացում, ցեղասպանություն և կոտորած» և կոչ արել մասնակցել Գյուլին հասցեագրված բողոքի հանրահավաքին: