Սարկոզիի հեռացումից փոփոխություններ ակնկալել պետք չէ

Քաղաքական09:27, 16 Մայիս 2012

Սարկոզիի հեռացումից փոփոխություններ ակնկալել պետք չէ

Թուրքական «Ջումհուրիյեթ» (Cumhuriyet) օրաթերթի վերլուծաբան Ութքու Չաքըրօզերն անդրադարձել է ֆրանս-թուրքական հարաբերությունների նոր հեռանկարին: Նշվում է, որ Սարկոզիի նախահագահության շրջանը պատմության մեջ մնաց որպես ֆրանս-թուրքական հարաբերությունների ամենավատ շրջան:

Հոդվածագիրը նկատել է տալիս, որ հետընտրական շաբաթը նշանավորվեց փոխադարձ մի քանի դրական ժեստերով: Մասնավորապես Թուրքիայի նախագահ Աբդուլլահ Գյուլը և վարչապետ Թայիփ Էրդողանը ջերմագին շնորհավորել էին Ֆրանսուա Օլանդին, իսկ վերջինս էլ եղավ առաջին նախագահը, ով ուղերձ հղեց Ֆրանսիայի թուրքական համայնքին:

Հայկական հարցի մասին հոդվածագիրը նշում է, որ այն կշարունակի մնալ որպես ֆրանս-թուրքական հարաբերությունների բաղադրիչ:

«Անշուշտ, Ֆրանսիայի սոցիալիստ առաջնորդի հետ աշխատանքներում դեռ կլինեն որոշակի դժվարություններ: Եվրոպայի խորհրդի խորհրդարանական վեհաժողովի անդամ Գյուլսուն Բիլգեհանն այն կարծիքին է, որ միշտ էլ սոցիալիստները երկու հարցում են դժվարություն ունենում` հասկանալու Թուրքիայի մոտեցումները` հայկական և կիպրական հարցերում: Պետք չէ ակնկալել, որ Սարկոզիի հեռացումով փոփոխություններ կլինեն Ֆրանսիայի դիրքորոշման մեջ հայկական հարցում»,- նշում է թուրք հոդվածագիրը: