Դավութօղլու-Ֆաբիուս. Ցեղասպանության բանաձև

Քաղաքական09:08, 06 Հուլիս 2012

Դավութօղլու-Ֆաբիուս. Ցեղասպանության բանաձև

Կայացել է Ֆրանսիայի և Թուրքիայի արտգործնախարարներ Լաուրյեն Ֆաբիուսի և Ահմեթ Դավութօղլուի հանդիպումը Փարիզում: Հանդիպումից հետո կողմերը հանդես են եկել համատեղ մամուլի ասուլիսով:

Ըստ «CNNTurk» լրատվականի` Ֆաբիուսը կարևորել է Թուրքիայի տարածաշրջանային դերը և հայտնել Ֆրանսիայի վճռականությունը Անկարայի եվրաանդամակցության գործընթացn առաջ մղելու հարցում:

Դավութօղլուն էլ լրագրողներին ասել է, որ իրենց նպատակը ֆրանս-թուրքական հարաբերությունների համար նոր բարիդրացիական շրջան սկսելն է: Նրա գնահատմամբ` հանդիպումն անցել է բարեկամական և բովանդակալից մթնոլորտում:

«Թեև մեր դիրքորոշումների մեջ առկա են որոշակի տարբերություններ, բայց այդ ամենը վերացնելու համար որոշել ենք առաջնորդվել մի ընդհանուր տեսլականով»,- ասել է Ահմեթ Դավութօղլուն: Վերջինս նաև տեղեկացրել է, որ Անկարան չեղյալ է հայտարարել բոլոր այն պատժամիջոցները, որոնք կիրառվում էին Փարիզի դեմ Հայոց ցեղասպանության հերքումը քրեականացնող օրինագծի ընդունման պատճառով:

Հայկական օրինագիծը մշակելու և նորից խորհրդարան ներկայացնելու վերաբերյալ Ֆաբիուսն ընդգծել է, որ դա Ֆրանսիայի քաղաքական գործիչների համար շատ զգայուն թեմա է: «Ինչպես գիտեք, Սահմանադրական դատարանը չեղյալ հայտարարեց ոչ վաղ անցյալում սենատի կողմից ընդունված այդ օրինագիծը: Եթե մենք շարժվենք նույն ճանապարհով, ապա նորից կմերժվենք Սահմանադրական դատարանի կողմից: Անհնար է, որ մենք գնանք նույն ճանապարհով», -ասել է Ֆրանսիայի արտգործնախարարը: