Դիարբեքիրի քաղաքապետը հայերին վերադարձի կոչ է անում

Տարածաշրջան09:54, 27 Սեպտեմբեր 2012

Դիարբեքիրի քաղաքապետը հայերին վերադարձի կոչ է անում

Թուրքական «Sondakika» լրատվական կայքի տեղեկացմամբ` Թուրքիայի Դիարբեքիր (պատմական Ամիդ) քաղաքում հրավիրվել էր կլոր սեղան Հայաստան-Թուրքիա թեմայով, որին մասնակցել են հայ և թուրք լրագրողներ: Կլոր սեղանից հետո Հայաստանից Թուրքիա մեկնած հայկական պատվիրակությանն ընդունել է Դիարբեքիրի քաղաքապետ Օսման Բայդեմիրը: Վերջինս նշել է, որ Դիարբեքիրի համար ներդրած լումա, թափած քրտինք ունեն ոչ միայն թուրքերը, այլ նաև հայերը, քրդերը, ասորիները և այլք:

Բայդեմիրը հայերին կոչ է արել վերադառնալ Դիարբեքիր` ասելով. «Մենք մերժում ենք օգտվել ջարդարարությանը մասնակցած մեր պապերի ժառանգությունից: Վերադարձեք դուք: Ինձ արգելված է արտերկիր գնալ: Եթե մի օր հանվի այդ արգելքը, շատ կուզենամ Երևան գնալ, Դիարբեքիրից մի փունջ ծաղիկ տանել և դնել զոհերի հուշակոթողին: Իմ ամենամեծ երազանքներից մեկն այն է, որ Թուրքիայում կանգնեցվի հայերի, թուրքերի, ասորիների, ինչպես նաև բոլոր հալածված ժողովուրդների համատեղ մի հուշարձան:

Ermenihaber.am