Թուրքիան Հոլանդիայից ստացավ զենիթահրթիռային համակարգեր

Տարածաշրջան09:34, 22 Հունվար 2013

Թուրքիան Հոլանդիայից ստացավ զենիթահրթիռային համակարգեր

ՆԱՏՕ-ի աջակցության շրջանակներում Հոլանդիայի կողմից Թուրքիային տրամադրված հակաօդային պաշտպանության (Patriot) զենիթահրթիռային համակարգերն արդեն Թուրքիայում են: Սկսվել են 60 բեռնախուց զինտեխնիկայով բեռնված նավի դատարկման աշխատանքները:

Այս մասին հայտնում է թուրքական «Անատոլիա» (Anadolu) լրատվական գործակալությունը: Աղբյուրի համաձայն` հակաօդային պաշտպանության այդ համակարգերը տեղակայվելու են Ադանայի տարածքում` թուրք-սիրիական սահմանից 100կմ հեռավորության վրա:

Հիշեցնենք, որ ՆԱՏՕ-ի աջակցության շրջանակներում թուրքական զինուժին «Patriot» համակարգերով տրամադրելու գաղափարին հավանություն են տվել ԱՄՆ-ի, Գերմանիայի և Հոլանդիայի իշխանությունները: Գերմանայից ուղարկված «Patriot»-ները տեղակայվում են Քահրամանմարաշում (Մարաշ), իսկ ԱՄՆ-ից ուղարկվելիք «Patriot»-ները ծրագրված է տեղակայել Գազիայնթափում (Այնթափ): Հիշյալ տեխնիկայի առաքումն ու տեղակայումը բացատրվում է ՆԱՏՕ-ի անդամ Թուրքիային Սիրիայի օդային հարձակման վտանգից ապահովագրելու հանգամանքով:

Ermenihaber.am