ԱՄՆ պետքարտուղարության խոսնակ. Էրդողանի և Դավութօղլուի հայտարարությունները մեզ անհանգստացնում են

Քաղաքական10:17, 06 Փետրվար 2013

ԱՄՆ պետքարտուղարության խոսնակ. Էրդողանի և Դավութօղլուի հայտարարությունները մեզ անհանգստացնում են

ԱՄՆ պետքարտուղարության խոսնակ Վիկտորիա Նուլանդը քննադատել է Իսրայելի` Սիրիայի վրա իրականացրած օդային հարձակման վերաբերյալ Թուրքիայի վարչապետի ու արտգործնախարարի հայտարարությունները:

«Թուրք պաշտոնյաների կողմից արվող սադրիչ հայտարարությունները մեզ շատ են անհանգստացնում: Մեր այս մտավախություններն Անկարայի ԱՄՆ դեսպանության միջոցով փոխանցել ենք թուրքական իշխանություններին»,-ասել է Նուլանդը:

Հիշեցնենք, որ Թուրքիայի արտգործնախարար Ահմեթ Դավութօղլուն դատապարտել էր Իսրայելի հարձակման հարցում Սիրիայի իշխանությունների անգործունեությունը:

«Սիրիական վարչակարգը 22 ամիս շարունակ ռմբակոծում ու գնդակոծում է իր խաղաղ բնակիչներին և, չգիտես ինչու, չի պատասխանում երկրի տարածքի վրա կատարվող իսրայելական հարվածներին: Միգուցե Իսրայելի ու Ասադի վարչակարգի միջև գաղտնի պայմանավորվածությո°ւն գոյություն ունի: Ասադն Իսրայելի հարձակումներն օգտագործում է իրեն զոհ ներկայացնելու և մուսուլմանական երկրների օգնությունը ստանալու համար»:

Իսկ Էրդողանն ասել էր. «Այժմ տարածաշրջանում ինչ ասես կարող է պատահել: Նրանք, ովքեր իսրայելական կառավարությանը վերաբերվել են որպես անառակ երեխայի, պետք է հասկանան, որ Իսրայելից ամեն բան կարող են սպասել»,- ասել է Էրդողանը:

Ermenihaber.am