Թուրքիայի 4 ազդեցիկ քաղաքական գործիչների հայտարարությունները

Տարածաշրջան14:23, 12 Փետրվար 2013

Թուրքիայի 4 ազդեցիկ քաղաքական գործիչների հայտարարությունները

Թուրքիայում մեծ կշիռ ունեցող հիմնական չորս կուսակցություններն այսօր ժողովներ են գումարել և անդրադարձել երկրի արտաքին ու ներքին քաղաքականության խնդիրներին: Ելույթներով հանդես են եկել քաղաքական ուժերի առաջնորդները: Թուրքական մամուլը ներկայացնում է կուսակցապետերի հղած ազդակների համառոտ բովանդակությունը:

«Արդարություն և զարգացում կուսակցություն» (ԱԶԿ-AKP)

Կուսակցության նախագահ, Թուրքիայի վարչապետ Ռեջեփ Թայիփ Էրդողան.

«Ոչ եվրամիության դռների մոտ 54 տարի սպասելու, ոչ էլ ահաբեկչության նկատմամբ հանդուրժողականություն ցուցաբերելու համբերություն է մնացել»:

Գլխավոր ընդդիմադիր ուժ «Ժողովրդահանրապետական կուսակցություն» (ԺՀԿ-CHP)

Կուսակցության նախագահ Քեմալ Քըլըչդարօղլու.

«Թուրք-սիրիական սահմանին տեղի ունեցած պայթյունի պատասխանատվությունը վարչապետ Էրդողանի ուսերին է: Սիրիայի հանդեպ իշխանությունների վարած քաղաքականությունը լիովին խրվել է ճահճի մեջ»:

«Ազգայնական շարժում կուսակցություն» (ԱՇԿ-AKP)

Կուսակցության նախագահ Դևլեթ Բահչելի.

«Սրանից հետո արդեն եթե լսվի «Էրդողան նախագահ, «Քուրդիստանի բանվորական կուսակցության չեմպիոն» խոսքերը, թող ոչ մեկին զարմանք չպատճառի և տարօրինակ չթվա: Դատապարտելի է թուրքական իշխանությունների բանակցությունները Օջալանի հետ Իմրալը կղզում»

«Խաղաղություն և ժողովրդավարություն» քրդական կուսակցություն (ԽԺԿ-BDP)

Կուսակցության նախագահ Սելահաթթին Դեմիթաշ.

«Թուրքիան պաշտոնապես պատերազմի մեջ չի մտել Սիրիայի հետ, բայց գիտենք, որ Սիրիայում տեղի ունեցող բախումների զգալի մասում կա Թուրքիայի մասնակցությունը: Ջեյլանփընարում զինված հրոսակները հետախուզական մարմինների հսկողության ներքո ելումուտ են անում Սիրիա: Երկար ժամանակ է, ինչ Թուրքիան Սիրիայի հետ պատերազմի մեջ է, բայց կառավարությունն այդ մասին չի ասում»:

Ermenihaber.am