Էրդողանը թույլատրել է քուրդ պատգամավորներին տեսակցել բանտարկյալ Օջալանին

Տարածաշրջան11:12, 18 Փետրվար 2013

Էրդողանը թույլատրել է քուրդ պատգամավորներին տեսակցել բանտարկյալ Օջալանին

Հայտնի են դարձել Քուրդիստանի բանվորական կուսակցության (ՔԲԿ- PKK) հիմնադիր Իմրալը կղզում ցմահ բանտարկության դատապարտված Աբդուլլահ Օջալանին այցելելու թույլտվություն ստացածների անունները:

Թուրքական «Hurriyet» պարբերականի հաղորդմամբ` Օջալանին տեսակցելու համար վարչապետՌեջեփ Թայիփ Էրդողանի կողմից հաստատված անձինք են հետևյալները` քրդական «Խաղաղություն և ժողովրդավարություն» կուսակցությունից Թուրքիայի Ազգային Մեծ Ժողովի պատգամավորներ Սելահեթթին Դեմիրթաշը, Փերվին Բուլդանը և անկախ պատգամավոր Ահմեթ Թուրքը: Իսկ ավելի վաղ`հունվարի 14-ին, Աբդուլահ Օջալանին հանդիպելու թույլտվություն էր ստացել նրա եղբայր Մեհմեթ Օջալանը:

Նշենք, որ «ՔԲԿ»-ը ստեղծվել է 1978թ. Դիարբեքիրում: Հիմնադիրը քրդերի առաջնորդ Աբդուլլահ Օջալանն է (Ափո), ով այժմ ցմահ բանտարկյալ է Իմրալը կղզու թուրքական բանտում: «ՔԲԿ»-ն ավելի քան 3 տասնամյակ զինված պայքար է մղում թուրքական պետության դեմ` նպատակ ունենալով Թուրքիայի հարավ-արևելյան և Իրաքի հյուսիս-արևմտյան մասում հիմնել անկախ պետություն` Քուրդիստան: Թուրքիան, ԱՄՆ-ն, Եվրամիությունը «ՔԲԿ»-ը համարում են ահաբեկչական կազմակերպություն:

Ermenihaber.am