CNNTurk. Հայաստանում նորից Սերժ Սարգսյանի ժամանակաշրջանն է

Քաղաքական11:22, 19 Փետրվար 2013

CNNTurk. Հայաստանում նորից Սերժ Սարգսյանի ժամանակաշրջանն է

«CNNTurk» լրատվականում հոդված է հրապարակվել Հայաստանում ացնկացված նախագահական ընտրության, հաղթող թեկնածուի ու հետագա ակնկալիքների մասին: «Հայաստանում նորից Սերժ Սարգյսանի ժամանակաշրջանն է» վերտառությամբ հոդվածում նշվում է, որ քվեների 58.64 տոկոսն իր օգտին ստացած Սերժ Սարգսյանը վերընտրվել է, իսկ երկրում ընդհանուր առմամբ հանգստություն է տիրում, ոչ մասսայական ընդվզումներ կան, ոչ էլ` մասսայական տոնախմբություններ:

«Այն, որ ընտրությանը մասնակցել է քվեարկելու իրավունք ունեցող քաղաքացիների միայն 60 տոկոսը, դա ցույց է տալիս ընտրությունների հանդեպ հասարակության ոչ այնքան մեծ հետաքրքրությունը»:

Հոդվածում նշվում է նաև, որ Սարգսյանի կառավարման առաջիկա տարիներին սպասվում է Ռուսաստանի հետ համագործակցության սերտացում և խորացում: Ընդգծվում է այն հանգամանքը, որ նախընտրական քարոզարշավի ժամանակ Սերժ Սարգսյանը Ռուսաստանի հետ հարաբերությունները բնորոշում էր որպես ռազմավարական, իսկ Միացյալ Նահանգների և Եվրոպայի հետ հարաբերություններ`` բարիդրացիական:

«Առաջիկայում սպասվում է, որ Հայաստանը մաս կկազմի Ռուսաստանի գլխավորած Եվրասիական միությանը և հետխորհրդային տարածքի երկրների համատեղ հրթիռային պաշտպանության համակարգին»,- գրում է «CNNTurk»-ը:

Իսկ ղարաբաղյան խնդրի կարգավորման առումով թուրքական լրատվամիջոցը լուրջ տեղաշարժ չի ակնկալում` պատճառաբանելով հետևյալ կերպ. «Կառավարման նոր շրջանում, Սարգսյանն իր թիկունքին կզգա հատկապես Ռուսաստանի աջակցությունը: Իսկ դա էլ իր հերթին նվազեցնում է հավանականությունը, թե հիմնախնդրի կարգավորման ուղղությամբ որևէ քայլ կկատարվի»:

Ermenihaber.am