Թուրք նախարարի կոչը Թուրքիայից հեռացած հայերին, հույներին, հրեաներին

Տարածաշրջան09:27, 08 Մարտ 2013

Թուրք նախարարի կոչը Թուրքիայից հեռացած հայերին, հույներին, հրեաներին

Թուրքական «Իհլաս» լրատվական գործակալության հաղորդմամբ Թուրքիայի մշակույթի և զբոսաշրջության նախարար Օմեր Չելիքը Բեռլինում տեղի ունեցող տուրիզմի ցուցահանդեսի ժամանակ հանդիպում է ունեցել տեղական և արտասահմանյան լրագրողների հետ, որտեղ խոսելով Թուրքիայից ինչ-ինչ պատճառներով հեռացած բնակիչների մասին ասել է , որ Թուրքիան այն պետությունն է , որ պատրաստ է ընդունել բոլորին՝ անկախ նրանց ունեցած ինքնությունից ու գաղափարներից:

Նշելով , որ իր երկրում 10-15 տարի առաջ մարդկանց ինքնությանը նախապատվություն տալու պատճառով որոշակի սխալներ են գործվել՝ ասել է. «Ես Թուրքիայի բոլոր քաղաքացիներին, Թուրքական կամ անատոլիական ծագում ունեցողներին, մեր հավատակիցներին ու ազգակիցներին, բոլորին ասում եմ, անկախ ձեր ինքնությունից, մտածելակերպից ու գաղափարախոսությունից, Թուրքիան ձեր հայրենիքն է: Մենք բոլորիդ համար պատասխանատվություն ենք կրում:

Նախկինում Թուրքիայից հեռացած հայերին, հույներին, հրեաներին, ինչպես նաև Գերմանիայի քաղաքացի դարձած թուրքերին ասում ենք, որ իրենց հայրենիքը Թուրքիան է: Թուրքիայի Հանրապետությունը նրանց կսատարի աշխարհի ցանկացած կետում, բավական է միայն, որ այդ մարդիկ կապ հաստատեն մեզ հետ »:

Ermenihaber.am