Թուրքիայում ջրի սակավությունն աճում է

Տարածաշրջան15:52, 21 Մարտ 2013

Թուրքիայում ջրի սակավությունն աճում է

Թուրքիայի Պետական ջրային գործերի գլխավոր վարչության կողմից պատրաստված անտառային և ջրային միջավայրին նվիրված զեկույցի համաձայն` Թուրքիան մեկ շնչին բաժին ընկնող ջրային պաշարներով համարվում է սուղ ջրային պաշարներ ունեցող երկիր:

Թուրքական «Փոսթա» թերթի տեղեկացմամբ զեկույցում նշվում է նաև, որ Թուրքիայում առկա 112 միլիարդ խորանարդ ջրի պաշարների օգտագործման ենթակա մասը կազմում է 39%, որից 32 միլիարդը ոռոգման, 7 միլիարդը խմելու և առօրյա օգտագործման, իսկ 5 միլիարդն արդյունաբերության սպառման համար է նախատեսվում:

Զեկույցում նշվում է, որ տարվա կտրվածքով մեկ շնչին բաժին ընկնող ջրային պաշարը 1000 խորանարդ մետրը չգերազանցող երկրները համարվում են ջրի աղքատություն ունեցող երկիր, 2000 մ³-ը չգերազանցող երկրները` ջրի պակասություն ունեցող երկիր, իսկ 8000 մ³-ը գերազանցող երկրները` հարուստ ջրային պաշարներ ունեցող երկիր:

Զեկույցից պարզ է դառնում, որ Թուրքիան համարվում է ջրի պակասություն ունեցող երկիր`տարվա կտրվածքով մեկ շնչին ընկնող 1.519 մ³ ցուցանիշով: Այնտեղ նշվում է նաև, որ համաձայն Թուրքիայի ազգային վիճակագրական ծառայության 2030 թվականին երկրի բնակչությունը 100 մլն-ի է հասնելու, և այդ պարագայում մեկ շնչին բաժին հանող ջրային պաշարը կնվազի մինչև 1.120 մ³-ի: Զեկույցում, որպես եզրակացություն, ասվում է, որ Թուրքիային անհապաղ անհրաժեշտ է ջրի պաշարների խնայողաբար օգտագործման մեխանիզմներ մշակել:

Ermenihaber.am