ՔԲԿ-ի ղեկավար Մ. Քարայըլան. «Օջալանի ուղերձը կյանքի ենք կոչելու»

Տարածաշրջան13:15, 22 Մարտ 2013

ՔԲԿ-ի ղեկավար Մ. Քարայըլան. «Օջալանի ուղերձը կյանքի ենք կոչելու»

Քուրդիստանի բանվորական կուսակցության կենտրոնը համարվող Քանդիլից Աբդուլլահ Օջալանի «զենքերը լռեցնելու» կոչի պատասխանը արդեն հնչել է:

ՔԲԿ-ի ղեկավար Մուրադ Քարայըլանը հայտարարել է, որ քրդերի առաջնորդ Աբդուլլահ Օջալանի ուղերձում նշված զենքերը վայր դնելու կոչը կյանքի են կոչելու:

Թուրքական «Փոսթա» թերթը, հղում անելով ՔԲԿ-ին մոտ կանգնած մի հրատարակչության, ներկայացնում է ՔԲԿ-ի ղեկավար Մուրադ Քարայըլանի հայտարարությունը, որտեղ մասնավորապես ասված է. «Մենք այդ հարցում մեզ վրա վստահ ենք: Այսօր Միջին Արևելքում առկա պայմանները, մեր ունեցած հնարավորություններն ու ուժը Քուրդիստանի ազատագրման հարցում մեզ վստահություն են ներշնչում: Սակայն մենք ցանկացած պայմաններով պատերազմ չենք ուզում: Եթե ինքնիշխան պետությունները պատրաստ են, մենք էլ պատրաստ ենք խաղաղ ճանապարհով ազատագրել Քուրդիստանը : Բոլորը պետք է իմանան, որ ՔԲԿ-ն պատրաստ է և ՛ խաղաղությանը, և՛ պատերազմին: Այդ պատճառով էլ Օջալանի սկսած գործընթացը պատրաստ ենք վճռականորեն կյանքի կոչել»:

Ermenihaber.am