Թուրքիայի ազգայնականները դուրս են գալիս փողոցային պայքարի

Տարածաշրջան08:49, 23 Մարտ 2013

Թուրքիայի ազգայնականները դուրս են գալիս փողոցային պայքարի

Թուրքական «Հաբեր ա» լրատվական կայքի փոխանցմամբ` «Ազգայնական շարժում» կուսակցությունը (ԱՇԿ-MHP) իր երիտթևին` այսպես կոչված ուլքուջուներին (իդեալիստներ), պատրաստվում է հանել փողոցային պայքարի:

ԱՇԿ-ն որոշում է կայացրել Իմրալիի գործընթաց անվանումը ստացած քրդական հարցի լուծման բանակցությունների և «Քուրդիաստանի բանվորական կուսակցության» (ՔԲԿ-PKK) ղեկավար, Իմրալի կղզում ցմահ բանտարկյալ Աբդուլլահ Օջալանի ուղերձների դեմ բողոքի միջոցառումներ և հանրահավաքներ անցկացնել:

Ազգայնականները, որոնք հենց սկզբից բացասական կեցվածք էին ընդունել քրդական հարցի կարգավորման նկատմամբ, նախատեսել են անցկացնել 9 հանրահավաք, որոնցից առաջինը` Բուրսա քաղաքում: ԱՇԿ նախագահ Դևլեթ Բահչելին հույս է հայտնել, որ հանրահավաքը բազմամարդ կլինի, որի ժամանակ ինքը հանդես կգա հատուկ ուղերձով:

Տեղեկացնենք, որ ԱՇԿ-ն հիմնադրվել է 1969թ. Ալփարսլան Թյուրքեշի կողմից: Ծայրահեղ աջակողմյան կուսակցություն է, որի 9 սկզբունքից ամենակարևորը «ազգայնականությունն» է: Համարվում է թուրքական «Գորշ գայլեր» ահաբեկչական խմբավորման քաղաքական թևը:

Ermenihaber.am