Քըլըչդարօղլու. «Քրդերից ոչ ոք դեռ չի ասել` զենքս վայր եմ դնում»

Տարածաշրջան09:56, 23 Մարտ 2013

Քըլըչդարօղլու. «Քրդերից ոչ ոք դեռ չի ասել` զենքս վայր եմ դնում»

Թուրքիայի ընդդիմադիր գլխավոր ուժի` «Ժողովրդահանրապետական կուսակցության» (ԺՀԿ-CHP) նախագահ Քեմալ Քըլըչդարօղլուն կոչ է արել թուրքական լրատվամիջոցներին սխալ տեղեկատվությամբ չմոլորեցնել հանրությանը:

Ըստ թուրքական «Սաբահ» օրաթերթի` ընդդիմադիր առաջնորդը նշել է, որ իզուր են թերթերն իրենց առաջին էջերին տպում «Հրաժեշտ զենքին» գլխագրերով լուրեր, ինչ է, թե նովրուզի տոնակատարության ժամանակ հնչեցրած ուղերձում քրդերի առաջնորդը կոչ է արել վայր դնել զենքերը:

«Բայց դեռ ոչ ոք չի ասել` վայր եմ դնում զենքս: Իզուր մի փորձեք համոզել ժողովրդին»,- ասել է Քըլըչդարօղլուն: Նա մասնակցել է «Քոչ» համալսարանում կազմակերպված քաղաքական հարցերով քննարկմանը, որի ժամանակ նաև նշել է.

«Սեղանի մի կողմում Թուրքիայի վարչապետ Ռեջեփ Թայիփ Էրդողանն է, մյուսում` քրդերի առաջնորդ Աբդուլլահ Օջալանը: Սակարկում են, չգիտենք ինչի մասին, իսկ չիմացած բանը մեկնաբանել չեմ կարող»:

Ermenihaber.am