Թուրք նախկին նախարար. «Օջալանի նամակն իրականում ինքը չի գրել»

Քաղաքական07:29, 25 Մարտ 2013

Թուրք նախկին նախարար. «Օջալանի նամակն իրականում ինքը չի գրել»

Թուրքիայի ներքին գործերի նախկին նախարար Սաադեթթին Թանթանը «Քուրդիստանի բանվորական կուսակցության» հիմնադիր առաջնորդ Աբդուլլահ Օջալանի նամակի իսկության մասին կասկած է հայտնել: Թուրքական «Հաբեր ա» լրատվական կայքը տեղեկացնում է, որ, ըստ Թանթանի, այդ նամակը գրել է ոչ թե Օջալանը, այլ Թուրքիայի վարչապետ Ռեջեփ Թայիփ Էրդողանի մերձավոր մարդկանցից մեկը:

Հիշեցնենք, որ Նովրուզի տոնակատարության ժամանակ ընթերցված նամակում Օջալանը կոչ էր անում քուրդ զինյալներին վայր դնել զենքը և լքել Թուրքիայի սահմանները:

«Ովքեր հետաքրքրվում են, թե ով է գրել Օջալանի նամակը, թող ստուգեն Էրդողանի ծառայողական մեքենան», - նշել է նախկին նախարարը: Վերջինս ՔԲԿ-ի գրոհայինների` Թուրքիայից դուրս գալը մեկնաբանել է որպես Իրանի դեմ ուղղված քայլ` ծրագրված ԱՄՆ-Իսրայել-Անգլիա առանցքի կողմից:

Նա նշում է, որ Էրդողանի գլխավորած «Արադարություն և զարգացում կուսակցությունը» (ԱԶԿ-AKP) և ՔԲԿ-ը նման ինքնագլուխ որոշում չէին կարող կայացնել: Իսկ հիմանական պատճառը Թանթանը համարում է, տարածաշրջանում մեկուսացող Իսրայել պետության անվտանգության ապահովման նպատակով քրդական պետության ստեղծումն է: Իսկ մինչև դա ՔԲԿ-ի զինյալներին երկրից դուրս հանելով` ցանկանում են Սիրիայի հյուսիսում ապստամբական ուժերի հետ պատերազմել Սիրիայի նախագահ Բաշար Ասադի վարչակազմի դեմ: Նախկին նախարարը այս համատեքստում Իսրայելի ներողությունը պատահական չի համարում:

Ermenihaber.am