Վաթան. «Թուրքիան բացում է իր օդային տարածքը ԱՄՆ անօդաչու սարքերի համար»

Տարածաշրջան08:32, 29 Մարտ 2013

Վաթան. «Թուրքիան բացում է իր օդային տարածքը ԱՄՆ անօդաչու սարքերի համար»

Թուրքական «Վաթան» օրաթերթի հոդվածագիր Լեվենթ Իչգենը գրում է, որ ԱՄՆ-ն մեծ վճռականությամբ տրամադրված է խոչընդոտել Իրանի կողմից միջուկային զենքի ստեղծմանը` նկատել տալով, որ այդ ամենի մեջ ներգրավվում է նաև Թուրքիան` իր օդային տարածքը բացելով ԱՄՆ անօդաչու թռչող սարքերի համար:

Ռամզաօդային ակադեմիայի կողմից Թուրքիայում առաջին անգամ կազմակերպված միջազգային ավիացիոն և տիեզերական ուժերի կոնֆերանսում ԱՄՆ-ի ներկայացուցիչ Բենջամին Լամբերթը հայտարարել է, որ Թուրքիան բացել է իր օդային տարածքը «RQ-4 Global Hawk» կոչվող լրտեսական անօդաչու թռչող սարքերի համար: Այդ անօդաչու թռչող սարքերը լայն հնարավորություն ունեն երկարատև թռիչք կատարել մայրցամաքների միջև` ժամեր շարունակ օդում մնալով հետախուզություն իրականացնել: Ամերիկացի մասնագետը տեղեկացրել է նաև, որ Թուրքիայի Ինջիրլիք քաղաքի մոտ տեղակայված ամերիկյան ռազմաբազայում կան MQ1 մարտական անօդաչու թռչող սարքեր, որոնք թռիչքի ժամանակ կարող են խոցել յուրաքանչյուր թիրախ:

Ըստ «Վաթանի»` Թուրքիայի գլխավոր շտաբի աղբյուրները հաստատում են, որ «RQ-4 Global Hawk»անօդաչու թռչող սարքերը Միջին Ասիայի երկրների մասին նյութեր են հավաքում:

Ոչ պատերազմական իրավիճակում Թուրքիայի օդային տարածքի օգտագործման թույլտվությունը հաստատվում է կամ գլխավոր շտաբի, կամ կառավարության կողմից:

Տեղեկացնենք, որ վերոհիշյալ կոնֆերանսին մասնակցել է ավելի քան 1000 նարկայացուցիչ 57 երկրից (ԱՄՆ, Ռուսաստան, Չինաստան, Շվեդիա, Անգլիա, Իտալիա, Գերմանիա, Բելգիա և այլն): Իսկ Իսրայելը և Իրանը հրավիրված չեն եղել: