Թուրքիան Սիրիայի հարցում շարունակում է «բենզինով գնալ կրակի մոտ»

Տարածաշրջան08:46, 30 Մարտ 2013

Թուրքիան Սիրիայի հարցում շարունակում է «բենզինով գնալ կրակի մոտ»

Թուրքական «Յենիմեսաժ» լրատվական կայքի սյունակագիրներից Մեհմեթ Էմին Քոչն անդրադարձել է թուրքական իշխանութունների և քրդերի միջև ընթացող բանակցություններին, այլ կերպ ասած` ԱԶԿ-ՔԲԿ բանակցային գործընթացի խութ ու խոռոչներին: ԱԶԿ-ն (Արդարություն և զարգացում կուսակցությունը) Թուրքիայում իշխանության է եկել 2002 թվականին: Կուսակցապետը Թուրքիայի ներկայիս վարչապետ Ռեջեփ Թայիփ Էրդողանն է: ՔԲԿ-ն (Քուրդիստանի բանվորական կուսակցություն) կազմավորվել է 1978-ին Աբդուլլահ Օջալանի (Ափո) կողմից և նպատակ ունի հասնել քրդական անկախ պետականության ստեղծմանը:

Մեհմեթ Էմին Քոչն իր հոդվածում գրում է, որ թուրք հասարակությունը իրավացիորեն անհանգստանում է ԱԶԿ-ՔԲԿ գործընթացի ստվերային ռիսկերից: Հեղինակի կարծիքով թուրքական իշխանություններն անազնիվ գտնվեցին սեփական ժողովրդի հանդեպ, երբ ամիսներ շարունակ գաղտնի սակարկում էին ՔԲԿ-ի հետ: Մեկ էլ հանկարծ քրդերի առաջնորդ Աբդուլլահ Օջալանը հրովարտակ-հորդորով է հանդես գալիս` ուղղված թուրքական պետությանը, սարերի քրդերին ու միջազգային հանրությանը: Մինչդեռ, ըստ հոդվածագրի, նախևառաջ երկրի վարչապետ Էրդողանն էր պարտավոր հանրությանը տեղյակ պահել ՔԲԿ-ի հետ տարվող բանակցությունների օրակարգի և ժամանկացույցի մասին:

Հոդվածում նաև նշվում է, որ Էրդողանի կառավարությունը պետք է հստակ պատասխան այն հարցին, թե արդյոք ՔԲԿ-ին օգտագործող ձեռքերը հիմա չեն պատրաստվում Թուրքիայի սահմաններից դուրս հանելով քուրդ գրոհայիններին մասնակից դարձնել Սիրիայի վարչակազմի դեմ արյունալի հեղափոխությանը: Միևնույն ժամանակ ակնարկվում է, որ այդտեղ ԱՄՆ-ի և Իսրայելի ձեռագիրը կա: Իսկ հարևան Սիրիայի հարցում Թուրքիա ընդունած կեցվածքը Մեհմեթ Քոչը բնութագրում է հետևյալ կերպ:

«ԱԶԿ-ն Սիրիայում բռնկված արյունահեղությունը մարելու փոխարեն շարունակում է բենզինով գնալ կրակի մոտ»:

Ermenihaber.am