ERMENI HABER AJANSI

Թուրքիայի վարչապետ Ռեջեփ Թայիփ Էրդողանը պատասխանել է իր հասցեյին հնչեցված դավաճանության մեղադրանքներին: Թուրքական «Հաբեր ա» լրատվական կայքը հայտնում է, որ Թուրքիայի վարչապետը ելույթ է ունեցել «Արդարություն և զարգացում կուսակցության» (ԱԶԿ-AKP)  խորհրդարանական խմբակցության ժողովի ժամանակ: Էրդողանը, ելույթի ընթացքում խոսելով Թուրքիայի տնտեսական աճի ցուցանիշներից, անդրադարձել է նաև, քրդական հարցի բանակցությունների շրջանակում ընդդիմադիր ճամբարից իր նկատմամբ հնչող քննադատություններին և վիրավորանքներին:

 Էրդողանը մասնավորապես ասել է. «Լուծման, խաղաղության, ազգային միասնության գործընթացին դավաճանություն մակդիր կպցնելու իմաստը հնարավոր չէ հասկանալ: Եթե  այս երկրում տվյալ իմաստով  դավաճանություն կա, ապա այն հենց Բահչելին և Քըլըչդարօղլուն են արել, քանի որ քրդական խնդիրը լուծելու համար երբեք ջանք չեն ցուցաբերել: Այս գործընթացը մեկ քայլ է դեպի  ավելի ազատ, ավելի ժողովրդավար, ավելի խաղաղ, հանգիստ Թուրքիայի նպատակին հասնելու համար: Թող ոչ ոք սադրանքների չդիմի: Ո´չ Քըլըչդարօղլուն, ո´չ էլ Բահչելին չեն կարող են սադրել: Ազգիս աջակցությունը մեզնից անպակաս թող լինի, բավական է»:

Ermenihaber.am