Էրդողանը քրդական դաշինք է ձևավորում

Տարածաշրջան08:19, 04 Ապրիլ 2013

Էրդողանը քրդական դաշինք է ձևավորում

Թուրքական «Վաթան» պարբերականը մեջբերում է անգլիական «Financial Times» թերթի սյունակագիր Գարդների վերլուծական հոդվածից հատվածներ, որոնք վերաբերում են քրդական հարցի լուծման ուղղված Անկարայի դիրքորոշմանը:

«Քրդական նոր տարվա օրը` մարտի 21-ին, Թուրքիայում անօրինական համարվող «Քրդական բանվորական կուսակցության» բանտարկված ղեկավար Աբդուլլահ Օջալանը, Թուրքիայի վարչապետ Ռեջեփ Թայիփ Էրդողանի ամենավստահված օգնականների հետ բանակցային գործընթացից հետո ազդարարեց թուրքական պետության դեմ 29 տարի մղված պայքարի զինադադար», - գրում է Գարդները` ըդգծելով, որ 100 տարի անց առաջին անգամ Միջին Արևելքի սահմանները վտանգի տակ են, և հնարավոր է, որ Էրդողանը Միջին Արևելքի սահմանների հարցի լուծման հանգույցը գտել է:

Ըստ հոդվածագրի` ՔԲԿ-ն նահանջի դիմաց մտքի ազատությունը դատապարտող և հազարավոր քուրդ քաղաքական ակտիվիստների ձերբակալման պատճառ դարձած ահաբեկչության դեմ պայքարի օրենքների հանրաքվեով վերացումը, սահամանդրության մեջ քաղաքացիական հավասարազոր իրավունքների ամրագրումը, քրդերենի ուսուցումը, հասարակական կյանքում օգտագործումը և որոշակի մակարդակում ղեկավարության մեջ ներմուծումը, ինչպես նաև ընտրական արգելանքի վերացումը կարգավորման գործընթացում կարևոր քայլերից են:

Սակայն, այս ամենը «մշակութային բարեփոխումներ չեն, այլ գաղափարական հեղաշրջում»:

Գարդները կարծում է, որ Էրդողանի` այս քայլին դիմելու հիմնական պատճառը Սիրիայի աստիճանական քայքայումն է և Բաշար Ասադի դեմ քաոսային ապստամբությունը: Անկարան այս գործընթացի շնորհիվ Սիրիայի հյուսիսը վերահսկող ՔԲԿ-ի հետ սերտ կապերի մեջ գտնվող կազմակերպության գոյությունից փորձում է օգուտ քաղել:

Հոդվածում նաև նշված է, որ Էրդողանը մի կողմից փորձելով նվազագույնի հասցնել Թուրքիայի քրդերին արվող զիջումները, մյուս կողմից էլ իրաքյան քրդերի հետ համագործակցության զարգացման մարտավարությունն առաջ տանելով ընդհանուր ռազմավարություն է ձևավորում: Վարչապետի ծրագիրը Սիրիայի և իրաքյան քրդերին «թուրքոսֆերայի» մեջ ներգրավելով հարավային շիաների դեմ սուննիական դաշինք ձևավորելու նպատակ է հետապնդում:

Ermenihaber.am