Օջալան. «Նահանջ առանց զենքի»

Տարածաշրջան09:06, 04 Ապրիլ 2013

Օջալան. «Նահանջ առանց զենքի»

Մինչ Թուրքիայում կազմվում է մտավորականների հանձնաժողով, քրդական «Խաղաղություն և ժողովրդավարություն կուսակցության» (ԽԺԿ-BDP) անդամներից կազմված թվով 4-րդ պատվիրակությունը դարձյալ մեկնել է Իմրալիի բանտ և հանդիպել քուրդ առաջնորդ Աբդուլլահ Օջալանի հետ:

Հիշեցնենք, որ օրեր առաջ Թուրքիայում հայտարարվել է «մտավորականների հանձնաժողովի» կազմը, որը բաղկացած է 63 հոգուց: Նպատակը թուրք-քրդական հակամարտության լուծման ուղիներ որոնելն է:Հանձնաժողովի կազմում են հասարակական գործիչներ, գիտնականներ, քաղաքացիական ակտիվիստներ, լրագրողներ: Նշենք, որ հանձնաժողովի կազմում ընդգրկվել է նաև Էթյեն Մահչուպյանը: Հայտնի լրագրողը 2007-2010 թվականներին եղել է «Ակօսի» գլխավոր խմբագիրը: Այժմ նա «Զաման» և «Թարաֆ» օրաթերթերի սյունակագիրներից է:

Թուրքական «Վաթան» օրաթերթը ԽԺԿ-ի իր աղբյուրներից տեղեկացել է, որ Օջալանը քուրդ պատգամավորների միջոցով «Քուրդիստանի բանվորական կուսակցության» (ՔԲԿ-PKK) անդամներին Թուրքիան լքելու վերաբերյալ կարգադրություն է ուղարկել: Տեղեկացվում է, որ Օջալանը հանդես է եկել առանց զենքի նահանջելու կոչով և սպասվում է, որ մոտակա օրերին ուղերձը ԽԺԿ-ական պատվիրակությունը կփոխանցի հյուսիսային Իրաքի քրդերին (Քանդիլ):

Ձեռք բերված տվյալների համաձայն` ճանապարհային քարտեզի մյուս կարևոր կետերը հետևյալն են.

• Նահանջելու գործընթացը պետք է սկսվի ապրիլի 18-ից Թոքաթ և Թունջելի նահանգներից:

• Դեպի Քանդիլ գնացողների համար դիտորդական խմբեր պետք է ձևավորվեն:

• Որպեսզի գործընթացն առանց խոչընդոտների ընթանա, Թուրքիայի ազգային հետախուզական ծառայությունը (MİT) Իրաքի քրդաբնակ հյուսիսում 6 դիտորդական գրասենյակ կհիմնի:

• Քանդիլի ՔԲԿ-ական ղեկավարների և ազգային հետախուզական ծառայության միջև համակարգումն ապահովելու են Բարզանիի ուժերը:

Ermenihaber.am