ԱՄՆ պետքարտուղար Ջոն Քերրին ժամանել է Ստամբուլ

Տարածաշրջան10:43, 07 Ապրիլ 2013

ԱՄՆ պետքարտուղար Ջոն Քերրին ժամանել է Ստամբուլ

Վաշինգտոնի օդանավակայանում պետքարտուղար Քերրիի օդանավի դռան հետ կապված անսարքության պատճառով նա ստիպված է եղել ողջ պատվիրակության հետ միասին տեղափոխվել մեկ այլ ինքնաթիռ, որով և մի փոքր ուշացումով`առավոտյան ժամը 4:10 հասել է Թուրքիա:

Թուրքական «Իհլաս» լրատվականի հաղորդմամբ` նրան Աթաթուրքի անվան օդանավակայանի պետական հյուրատանը դիմավորել են Վաշինգտոնում Թուրքիայի դեսպան Նամըք Թանը և Անկարայում ԱՄՆ դեսպան Ֆրենսիս Ռիկարդիոնեն: Ինչից հետո էլ ձեռնարկված անվտանգության միջոցառումների շրջանակներում հյուրին զրահապատ մեքենայով ուղեկցել են հյուրանոց:

Նախատեսվում է Քերրիի հանդիպումը Թուրքիայի վարչապետ Ռեջեփ Թայիփ Էրդողանի և արտգործ նախարար Ահմեդ Դավութողլույի հետ: Վերջինիս հետ նաև համատեղ մամլո ասուլիս կլինի:

Հաղորդվում է, որ ԱՄՆ պետքարտուղար Ջոն Քերրին Թուրքիայից հետո կայցելի Իսրայել և Պաղեստին, այնուհետև ապրիլի 10-11-ը G-8 արտգործնախարարների հավաքին մասնակցելու համար կլինի Լոնդոնում, որին էլ կհաջորդի նրա այցերը Սեուլ, Պեկին և Տոկիո :

Ermenihaber.am