Երկրաշարժ` Թուրքիայում

Տարածաշրջան07:00, 20 Ապրիլ 2013

Երկրաշարժ` Թուրքիայում

Թուրքական «Հաբերգազեթե» լրատվական կայքի տեղեկացմամբ` Քահրամանմարաշ նահանգի Փազարջըք շրջանում տեղի է ունեցել երկրաշարժ: Ստորգետնյա ցնցման ուժգնությունը Ռիխտերի սանդղակով կազմել է 4 բալ: Նախնական տեղեկություններով` երկրաշարժից մարդկային ու նյութական կորուստներ չկան:

Թուրքիայի արտակարգ իրավիճակների վարչության սեյսմիկ կենտրոնի տվյալների համաձայն` երկրաշարժը տեղի է ունեցել կեսգիշերին: Ցնցումները զգացվել են հարևան շրջաններում ևս:

Նշենք, որ Քահրամանմարաշը հայոց պատմական Մարաշն է, որը մի շարք այլ հայկական բնակավայրերի ճակատագրին է արժանացել` ենթարկվելով անվանափոխության: Այդ շարքից է նաև Այնթափը, որն այժմ վերանվանված է Գազիայնթեփ (հաղթող Այնթափ), Ուրֆան, որը դարձել է Շանլըուրֆա (փառապանծ Ուրֆա): Հայկական նախկին բնակավայրերի անունների փոփոխության գործընթացը սկսվել է դեռ Էնվեր փաշայի` 1914 թ. արձակած հրամանից, որով բոլոր նահանգապետերին կարգադրվում էր փոխել թուրքական հնչողություն չունեցող տեղանունները։ Հայ պատմաբանների մոտավոր հաշվարկներով` մինչև այժմ փոխվել է շուրջ 24.000 հայկական տեղանուն:

Ermenihaber.am