ERMENI HABER AJANSI

Անցած շաբաթ պաշտոնական այցով Թուրքիա ժամանած Սաուդյան Արաբիայի բանակի գլխավոր շտաբի պետ, բանակի գեներալ Հուսեյին Բին Աբդուլլահ Գոբաիլը Թուրքիայի զինված ուժերի գլխավոր շտաբի պետ Նեջդեթ Օզալից բացի հանդիպումներ է ունեցել նաև երկրի նախագահ Աբդուլահ Գյուլի և վարչապետ Ռեջեփ Թայիփ Էրդողանի հետ: Թուրքական «Սաբահ» թերթի փոխանցմամբ նման բարձրաստրճան ընդունելությունը պայմանավորված է եղել Սաուդյան Արաբիայի բանակի գեներալի` Թուրքական կողմի հետ  2 միլիարդ դոլար արժողությամբ ռազմական տեխնիկայի գնման պայմանագրի վերաբերյալ բանակցություններով:

Հաղորդվում է, որ բանակցությունները ընթացել են Սաուդյան Արաբիայի կողմից թուրքական արտադրության «ANKA» անօդաչու թռչող սարքերի և կրկին թուրքական արտադրության «ALTAY» տանկերի գնման շուրջ:

Թերթի տվյալներով թուրքական զինված ուժերի համար նախատեսված «ANKA» անօդաչու թռչող սարքը դեռևս հունվարին անցել է թռիչքի բոլոր թեսթերը և դրվել սերիական արտադրության: Սարքի թռիչքի առավելագույն հեռավորությունը 200 կմ է, իսկ թռիչքի տևողությունը` 18 ժամ: Պայմանավորվածության համաձայն նույն սարքից արտադրվելու է նաև Սաուդյան Արաբիայի բանակի համար:

Նշենք, որ  «ALTAY»-ը հիմնական մարտական տանկ է, որն արտադրվում է թուրքական զինված ուժերի կարիքների համար: Այն կշռում է 60 տոննա, կարող է զարգացնել մինչև 70 կմ/ժ արագություն: Տանկի թնդանոթի տրամաչափը 122 մմ է, զինված է նաև 12,7 տրամաչափի գնդացիրներով: Անձնակազմի թիվը կազմում է 4 մարդ:Սկզբնական փուլում նախատեսվում է արտադրել 250 անուն տանկ:Տանկի արժեքը կկավմի մոտ 5.4 միլիոն դոլար:

Ermenihaber.am