ՔԲԿ-ի զինյալները մայիսի 8-ին լքում են Թուրքիան

Տարածաշրջան14:05, 25 Ապրիլ 2013

ՔԲԿ-ի զինյալները մայիսի 8-ին լքում են Թուրքիան

Քուրդիստանի բանվորական կուսակցությունը հայտարարել է, որ մայիսի 8-ին սկսելու է իր ուժերը Թուրքիայից դուրս բերելու գործընթացը:

Թուրքական «Ֆրաթ» լրատվական գործակալության փոխանցմամբ, Իրաքյան Քանդիլ քաղաքում կազմակերպված մամլո ասուլիսի ժամանակ ՔԲԿ-ի բարձրագույն ղեկավարներից Մուրադ Քարայըլանը հայտարարել է. «Մայիսի 8-ին սկսում ենք մեր զինյալների Թուրքիայից տարհանման գործընթացը: Եթե նրանց վրա հարձակում լինի, գործընթացը կկանգնեցվի»:

Հաղորդվում է, որ մամլո ասուլիսից առաջ հրավիրված փոքրաթիվ լրագրողներից հավաքել են բջջային հեռախոսները:

Ասուլիսի ժամանակ Քարայըլանը իր գոհունակությունն է հայտնել «Թայմս» հանդեսում աշխարհի 100 ամենաազդեցիկ մարդկանց շարքում Օջալանի անվան տեղ գտնելու համար և այդ առիթով իր շնորհակալությունն է հայտնել հոդվածի հեղինակ Ջերի Ադամսին:

Հիշեցնենք, որ ՔԲԿ-ի առաջնորդ Աբդուլլահ Օջալանը մարտի 21-ին` Նովրուզի տոնակատարության ժամանակ, ընթերցված իր ուղերձում կազմակերպության զինյալներին զենքերը վայր դնելու և Թուրքիայի տարածքը լքելու կոչ էր արել:

Ermenihaber.am