Էրդողանի` ԱՄՆ կատարելիք այցի առանձնահատկությունը

Քաղաքական09:01, 14 Մայիս 2013

Էրդողանի` ԱՄՆ կատարելիք այցի առանձնահատկությունը

Թուրքիայի կառավարության ղեկավար Ռեջեփ Թայիփ Էրդողանը մայիսի 16-ին մեկնելու է Միացյալ Նահանգներ: Թուրքակամ մամուլի բնորոշմամբ` կատարվելիք այցը կարևորություն ունի ոչ միայն քաղաքական, այլ նաև տնտեսական տեսանկյունից:

Քննարկումների օրակարգում լինելու են ազատ առևտրի պայմանագրի և երկու երկրների միջև առևտրաշրջանառության ծավալների մեծացման հարցեր: Այդ իսկ պատճառով Էրդողանն իր գլխավորած պատվիրակության կազմում ներառել է նաև գործարար աշխարհի առաջատար ներկայացուցիչների:

Տեղեկացվում է, որ Թուրքիայի վարչապետը Վաշինգտոնում հանդիպում է ունենալու Սպիտակ տան ղեկավարի` Բարաք Օբամայի հետ: Կողմերը քննարկելու են ինչպես տարածաշրջանային, այնպես էլ միջազգային նշանակության մի շարք հարցեր:

Ուշագրավ մի առանձնահատկություն ունի Թուրքիայի վարչապետի այցն ԱՄՆ, որի վրա սևեռվել են թուրքական լրատվամիջոցները: Էրդողանին ամերիկյան օդանավակայանում և Սպիտակ տան մատույցներում դիմավորելու են զինքվորական շքահանդեսով: Սա հազվադեպ կիրառվող ընդունելության ձև է պետության ղեկավարներին հյուրընկալելիս: Այդպիսով Էրդողանը կլինի առաջին թուրք պետական այրը, որ նման պատվավոր ընդունելության կարժանանա ԱՄՆ իշխանությունների կողմից:

Ermenihaber.am