Օջալանը ևս կքվեարկի Թուրքիայի նոր սահմանադրության համար

Տարածաշրջան11:26, 16 Մայիս 2013

Օջալանը ևս կքվեարկի Թուրքիայի նոր սահմանադրության համար

Թուրքական «Ջումհուրիյեթ» էլեկտրոնային լրատվամիջոցի փոխանցմամբ, Թուրքիայում կառավարող «Արդարություն և զարգացում կուսակցությունը», ընդիմադիր «Ժողովրդահանրապետական կուսակցությունը» և քրդական «Խաղաղություն և ժողովրդավարություն կուսակցությունը» նոր սահմանադրության հանրաքվեի ժամանակ Իմրալը մեկուսարանում ևս քվեատուփ դնելու հարցի շուրջ համաձայնության են եկել:

Թուրքիայի մեջլիսի Սահմանադրության համաձայնեցման ենթահանձնաժողովում քննարկվել է ազատազրկվածներին ընտրության իրավունք տրամադրելու հարցը: Ծայրահեղական դիրքորոշումներով հայտնի Ազգայնական շարժում կուսակցությունը դեմ է արտահայտվել այդ հոդվածին պատճառաբանելով, որ կալանավորներին ընտրության իրավունք տրամադրելու դեպքում Իմրալը կղզում ցմահ ազատազրկված քրդերի առաջնորդ Աբդուլլահ Օջալանը ևս իրավունք կստանա քվեարկել Թուրքիայի սահմանադրության համար:

Այնուամենայնիվ, որոշում է կայացվել ընտրելու, ընտրվելու և քաղաքական գործունեություն ծավալելու մասին հոդվածում ամրագրել դատապարտյալներին ընտրության իրավունք տվող կետը: Իսկ այդ նույն հոդվածի երկրորդ կետը նախատեսում է, որ պետությունը ձերբակալված կամ բանտարկված անձանց համար պիտի ապահովի կրոնական, ստեղծագործական կացութաձևի ու իր սեփական լեզվով խոսելու հնարավորություններ ընձեռող պայմաններ:

Ermenihaber.am