Թուրքիան սահմանադրական հանրաքվեի նախաշեմին

Տարածաշրջան08:43, 20 Մայիս 2013

Թուրքիան սահմանադրական հանրաքվեի նախաշեմին

Պաշտոնական քառօրյա այցով Միացյալ Նահանգներում գտնվող Թուրքիայի վարչապետ Ռեջեփ Թայիփ Էրդողանը Սան-Ֆրանցիսկոյում պատասխանել է իրեն ուղեկցող թերթերի գլխավոր խմբագիրների հետ: Այս մասին տեղեկացնող թուրքական «Զաման» պարբերականը հայտնում է, որ զրույցի ընթացում Էրդողանն անդրադարձել է Թուրքիայի արտաքին ու ներքաղաքական հարցերին, տնտեսությանը, սահմանադրական բարեփոխումներին:

Սիրիայի վերաբերյալ Էրդողանը նշել է, որ այդ երկիրը պետք է «ասադազերծվի»: Իսկ Ռուսաստանի դիրքորոշման մասին նշել է, թե առաջիկա օրերին կերևա ինչքան է Կրեմլը մնալու Ասադի վարչակազմի կողքին:

Թուրքիայում իշխող կուսակցության սահմանադրական փոփոխությունների նախագծի իրագործման հավանականության մասին հարցին վարչապետ Էրդողանը նախագահ Գյուլի պես ցածր է գնահատել: Իրենք խորհրդարանում ունեն 326 պատգամավոր, իսկ դա բավարար չէ քվեարկության դրական արդյունք ապահովելու համար: Վարչապետը նշել է, որ նոր սահմանադրության նախագիծն իրենք մտադիր են ներկայացնել փակ քվեարկության, գուցե դա արդյունք տա: Եթե գոնե այլ կուսակցության 4 պատգամավոր հօգուտ նոր նախագծի քվեարկի, ապա 2014-ին Թուրքիայում հանրաքվե կանցկացվեի նոր սահմանադրություն ունենալու համար:

«Եղավ` եղավ, չէ` չէ: Աշխարգի վերջը չի»,- ասել է Էրդողանը:

Ermenihaber.am