Թուրքիա. ոստիկանական ուժերը դուրս են բերվել Գեզի զբոսայգուց

Տարածաշրջան15:56, 01 Հունիս 2013

Թուրքիա. ոստիկանական ուժերը դուրս են բերվել Գեզի զբոսայգուց

Թուրքական «Սթարգազեթե» ինտերնետային պարբերականի հաղորդմամբ ժամը 15:30-ից սկսած Ստամբուլի կենտրոնական Թաքսիմ հրապարակի հարակից Գեզի այգուց ոստիկանների աստիճանական դուրսբերումն ավարտվել է: Հաղորդվում է, որ ոստիկանների դուրս գալու ընթացքում ևս բախումներ են եղել. երբ ցուցարարները ոստիկանների վրա շշեր են նետել, նրանք կրկին արցունքաբեր գազով են պատասխանել: Այնուամենայնիվ ոստիկաններն արդեն հեռացել են Գեզի այգուց և հարակից Թաքսիմ հրապարակից: Այս պահին Գեզի զբոսայգում և Թաքսիմ հրապարակում միայն ցուցարարներն են գտնվում, որոնց թիվը գնալով ավելանում է:

Մյուս կողմից էլ թուրքական ոստիկանությունն է հայտրարություն տարածել, որում մասնավորապես ասված է. «Թաքսիմ հրապարակում և Գազի զբոսայգում տեղի ունեցող անօրինական գործողությունների հետևանքով, հակառակ բազմիցս կատարված զգուշացումներին, շարունակում են հարձակումները շրջակայքում գտնվող աշխատանքային տեխնիկայի, բանվորների, անվտանգության ծառայողների ուղղությամբ, ինչն էլ կանխելու նպատակով ոստիկանությունը համաչափ միջամտություն է իրականացնում վերոնշյալ գործողություններին: Այդ միջամտության ընթացքում կիրառվում է նաև թույլ չափաբաժիններով արցունքաբեր գազ»:

Ermenihaber.am