ERMENI HABER AJANSI

«Լրագրողներ առանց սահմանների» (Reporters sans frontieres-RSF) միջազգային կազմակերպությունը, քննադատելով Թուրքիայի ամբողջ տարածքում կազմակերպվող Գեզի զբոսայգու համար բողոքի ակցիաների ժամանակ ոստիկանության կողմից ուժի կիրառման փաստը, հայտնել է, որ ուժի և բռնության գործադրման հետևանքով 14 լրագրող է վիրավորվել:

Կազմակերպությունը  նշում է, որ զանգվածային բողոքը վերածվել են հակակառավարական ելույթների, իսկ դրանց մասնակցող բազմաթիվ մարդիկ տարբեր աստիճանների մարմնական վնասվածքներ են ստացել:

«Մենք կիսում ենք տասնյակ կազմակերպությունների, այդ թվում և «Թուրքիայի լրագրողների միության», ըմբոստության զգացումը: Ակնկալում ենք, որ լրագրողների անվտանգությունը կերաշխավորվի և լրատվամիջոցներն անկողմնակալ վերաբերմունք կցուցաբերեն իրադարձությունների լուսաբանման գործում»,- նշված է կազմակերպության հաղորդագրությունում:

«Լրագրողներ առանց սահմանների» կազմակերպությունն անդրադարձել է նաև Թուրքիայում լրատվության կողմնակալությանը և դրա դեմ ուղղված ցուցարարների բողոքներին` քննադատելով CNNTürk, Kanal D, ATV, Star TV, Show TV, TRT, Star, Sabah ve HaberTürk լրատվամիջոցների կողմնապահությամբ աչքի ընկած հեռարձակումները:

Տեղեկտվության արտահոսքը փորձում են կանխել Թուրքիայի անվտանգության ծառայությունները: Ստեղծվել է մասնագԻտական հատուկ խումբ, որը  վերահսկում է սոցիալական ցանցերը` «սադրիչ տեղեկություններ» թույլ չտալու համար:

Վերջին օրերին Իզմիր քաղաքում 34 բլոգեր էր ձերբկալվել` սոցցանցերում դեպքերը չափազանցված ներկայացնելու, անօրինական ցույցերի, քայլերթերի կոչ անելու, հանրային կարգը խաթարելու, ժողովրդին հանցագործության մղելու մեղադրանքով:

Թուրքական «Հաբերթուրք» լրատվական կայքի տեղեկացմամբ` այսօր դատախազության կարգադրությամբ բլոգերներից 33-ը ազատ է արձակվել:

Հիշեցնենք, որ մայիսի 28-ից Թուրքիայում սկսված զանգվածային բողոքի ցույցերի պատճառն իշխանությունների քաղաքաշինական նոր ծրագիրն է, ըստ որի, Ստամբուլի կենտրոնական Գեզի զբոսայգու մեծ մասը պետք է ոչնչացվեր, իսկ ծառերը` հատվեին: Զբոսայգու ոչնչացմանն ու ծառահատմանն ընդդիմացած ցուցարարների դեմ թուրքական ոստիկանությունը բիրտ ուժ է կիրառել` օգտագործելով արտասվաբեր գազ, ջրցան մեքենաներ, պլաստիկ փամփուշտներ և հատուկջոկատայիններ: Հետևանքը եղավ այն, որ բնապահպանական բնույթի ցույցերն աստիճանաբար վերածվեցին հակառավարական ակցիաների և ընդգրկեցին Թուրքիայի տասնյակ քաղաքներ: Վերջին տվյալների համաձայն` կան հարյուրավոր ձերբակալվածներ, վիրավորներ և 4 զոհ:

Ermenihaber.am