ERMENI HABER AJANSI

Ադրբեջանական սփյուռքի հարցերով  պետական հանձնաժողովի նախագահ Նազիմ Իբրահիմովը հայտնել է, որ 1915 թվականի առնչությամբ հայերի ձեռնարկած գործողություններին դիմակայելու համար Թուրքիայի կողքին են լինելու և աջակցելու են նրան:

Թուրքական «Հաբեր վաքթի» լրատվական կայքը փոխանցում է, որ Իբրահիմովը ադրբեջանական սփյուռքի կառույցներին արդեն տեղեկացրել և հանձնարարություններ է տվել ընդդեմ «հայկական պնդումների» թուրքական սփյուռքի հետ միասնաբար հանդես գալու մասին:

Պետական հանձնաժողովի նախագահը մասնավորապես նշել է, որ այն վայրերում, որտեղ թուրքական սփյուռքը փոքրաթիվ է, հայկական հարցերին կմիջամտեն ադրբեջանական կառույցները և տվյալ երկրի հանրությանը կտեղեկացնեն իրողությունը:

Իբրահիմովը, հշեցնելով Հեյդար Ալիևի հայտնի կարգախոսը.  «Մեկ ազգ, երկու պետություն», ասել է. «Մեկ ազգը  երկու խնդիր չի կարող ունենալ` մեր խնդիրները նույն են: Հայկական  հարցերը, որոնց առաջ Թուրքիան միայնակ է մնացել, միևնույն ժամանակ մեր խնդիրներն են: Ղարաբաղի հարցում էլ թուրքական սփյուռքն է Ադրբեջանին աջակցում և համաշխարհային հանրությանը այդ հարցում տեղեկություն տալիս»:

Ըստ Իբրահիմովի` թյուրքախոս պետությունների համագործակցության խորհրդի անդամ երկրներից Ղազախստանը և Ղրղզստանը նույնպես աջակցում են Ադրբեջանին և Թուրքիային:

«Դա էլ մեր ուժին ուժ կավելացնի: Ե´վ Թուրքիայի, և´ Ադրբեջանի, և´ Ղազախստանի, և´ Ղրղզստանի և ընդհանրապես ամբողջ թյուրքական աշխարհի դեմ ուղղված որևէ անիրավության դեմ մենք միասնաբար ենք գործելու»,- եզրափակել է Իբրահիմովը:

Ermenihaber.am