ERMENI HABER AJANSI

Թուրքական «Սաբահ» պարբերականը տեղեկացնում է, որ քրդական «Խաղաղություն և ժողովրդավարություն կուսակցության» կողմից Դիարբեքիրում կազմակերպված «Իշխանություն, քայլ արա´»  քայլերթի ընթացքում տեղի ունեցած բախումների պատճառով վիրավորվել է 6 քաղաքացի, որոնցից մեկը` ոստիկան, մեկը` լրագրող:

Ոստիկանությունը թույլ չի տվել քայլերթի մասնակիցներին անցնել  Թուրգութ Օզալի անվան զբոսայգով: Ինչից հետո պատգամավոր Այսել Թուղլուքը, կուսակցության ավտոբուսի վրա բարձրանալով, սկսել է մամուլի հայտարարություն անել: Այդ ընթացքում հավաքվածների միջից որոշ դիմակավոր մարդիկ սկսել են ոստիկանության վրա քարեր նետել: Տեղի ունեցած բախումներից 6 մարդ է վիրավորվել:

Տեղեկացնենք, որ այս բախումները կապված են Լիջե  գավառում տեղի ունեցած դեպքերի հետ:

Դիարբեքիրի Լիջե գավառի Քայաջըք գյուղում ոստիկանական պարեկային շենքի կառուցման աշխատանքները խոչնդոտող խմբի և ոստիկանության միջև բախումներ էին տեղի ունեցել:

Դիրաբեքիրի նահանգապետի հայտարարության մեջ ասվում է , որ 1մի խումբ, որը նախօրոք մամուլի հայտարարություն էր տարածել, որ ցանկանում են կառուցապատումը  դադարեցնել, դյուրավառ հեղուկով լցած շշերով (մոլոտով), քարերով, մահակներով և ինքնաշեն պայթուցիկներով զինված հարձակվել է պահակակետի վրա: Ոստիկանության բանավոր նախազգուշացումները անտեսելով` խումբը շարունակել է հարձակումը պահակակետի ուղությամբ:

Թուրքական  «Հյուրիյեթ» թերթի փոխանցմամբ սստիկանությունը կրակ է բացել ցուցարարների վրա և  կիրառել է արցունքաբեր գազ:

Արդյունքում 18-ամյա մի տղա զոհվել է, 9 հոգի վիրավորվել, որոնցից 2-ը վիճակը գնահատվում է ծանր:

Այս դեպքից անմիջապես հետո Լիջեի համար բողոքի ակցիաներ կազմակերպվեցին Ստամբուլում, Իզմիրում:

Դրությունը Դիարբեքիրում դեռ շարունակում է լարված մնալ:

Ermenihaber.am