Քրդական կուսակցությունը պահանջում է ազատել Օջալանին

Տարածաշրջան07:28, 03 Հուլիս 2013

Քրդական կուսակցությունը պահանջում է ազատել Օջալանին

Թուրքիայում քրդական «Խաղաղություն և ժողովրդավարություն» (ԽԺԿ-BDP) կուսակցության պատգամավոր Սեբահաթ Թունջելը հայտնել է, որ քրդերի առաջնորդ Օջալանին, որը անկախ բժիշկ է պահանջել, պետք է անկախ բժիշկներից կազմված պատվիրակություն ուղարկել:
ԽԺԿ կողմից սկսված «Կառավարություն, քայլ արա´» բողոքի ակցիայի շրջանակներում մի խումբ կուսակցականներ դատական բժշկության հաստատության շենքի առջև նստացույց են կազմակերպել: Ցուցարարների խմուբը մամուլի հայտարարություն է արել, որով պահանջվում է հիվանդ բանտարկյալներին ազատ արձակել: Սեբահաթ Թունջելը, որը նույնպես մասնակցում էր բողոքի ակցիային, կառավարությանը կոչ է արել կոնկրետ քայլեր ձեռնարկել:

Նա մասնավորապես ասել է. «Թուրք, քուրդ, լազ, չերքեզ, հայ, այս երկրում ապրող ժողովրդների հետ, եթե ուզում եք նոր համաձայնագրի հասնել, ապա դա իրագործելի է միայն քրդական հարցի լուծման դեպքում: Իսկ քրդական հարցի լուծումը կապված է քուրդ ժողովրդի առաջնորդ Օջալանի ազատ արձակման հետ: Անհրաժեշտ է, որ այս հարցը իշխանությունները այժմվանից ևեթ օրակարգի մեջ ընդգրկեն»:

Ermenihaber.am