Թուրքիան ավելացրել է իր զորախմբի քանակը բռնազավթված հյուսիսային Կիպրոսում

Տարածաշրջան06:48, 04 Հուլիս 2013

Թուրքիան ավելացրել է իր զորախմբի քանակը բռնազավթված հյուսիսային Կիպրոսում

Կիպրոսի ստրատեգիական հետազոտությունների կենտրոնը ներկայացրել է զեկույց, որում, ըստ «razm.info»-ի, արտացոլվել են կղզում զինված ուժերի թվաքանակի վերաբերյալ տվյալներ։

Նշյալ զեկույցի համաձայն` կղզու հյուսիսային հատվածում, որը Թուրքիան 1974 թվականին բռնազավթել է և ստեղծել այսպես կոչված Հյուսիսային Կիպրոսի Թուրքական Հանրապետությունը, 2001-2012 թվականներին տեղակայված է եղել 36 հազար զինծառայող։ Սակայն վերջին տարվա ընթացքում Թուրքիան օկուպացրած շրջանում զինծառայողների թիվն ավելացրել է 7 հազարով և ներկայում այն կազմում է 43 հազար։

Կիպրաբնակ թուրքերի թիվը կազմում է 5 հազար, իսկ պահեստազորը՝ 26 հազար մարդ։ Այսպիսով, գործող զինուժի և պահեստազորի ընդհանուր թիվը կազմում է 74 հազար: Կիպրոսի մյուս հատվածի զինված ուժերը, այդ թվում նաև Հունաստանի ԶՈւ ստորաբաժանումները միասին կազմում են 62.950 մարդ։

Զեկույցում ներկայացվել է նաև Կիպրոսում տանկերի քանակը։ Հունական հատվածում կա 221, իսկ թուրքերի օկուպացրած հատվածում՝ 349 տանկ։ Կիպրոսի տարածքում տեղակայված Մեծ Բրիտանիայի երկու ռազմաբազաներում համապատասխանաբար կա 1.678 և 855 զինծառայող։