Թուրքիա. Մշակույթի նախարարն ընդունել է ուդի հայազգի վարպետ Երվանդ Բոստանջըին

Տարածաշրջան06:53, 15 Հուլիս 2013

Թուրքիա. Մշակույթի նախարարն ընդունել է ուդի հայազգի վարպետ Երվանդ Բոստանջըին

Նախօրեին Թուրքիայի մշակույթի և զբոսաշրջության նախարար Օմեր Չելիքն ընդունել է վերջին 21 տարին ԱՄՆ-ում ապրելուց հետո կրկին Թուրքիա վերադարձած ուդի հայտնի վարպետ հայազգի Երվանդ Բոստանջըին: Թուրքական «Սաբահ» էլեկտրոնային լրատվականի հաղորդմամբ՝ ընդունելությունը տեղի է ունեցել Ստամբուլի համագումարների և ցուցահանդեսների միջազգային պալատում: Թուրք նախարարը նշելով, որ Երվանդ Բոստանջըն առաջինն էր, ով արձագանքեց Անատոլիայից հեռացած արվեստագետներին ուղղված վերադարձի կոչին, ասել է. «Այն Թուրքիան, որն իր քաղաքացիներին ստիպել է, հեռանալ այլ երկրներ, մնացել է անցյալում: Այլևս ուզում ենք այլ երկրներում հաստատված մեր քաղաքացիները վերադառնան իրենց երկիր: Դա Թուրքիայի մեծությունն ու հարստությունն է»:

Թուրք նախարարը ևս մեկ անգամ արտահայտել է իր այն միտքը, որ Թուրքիայից արտագաղթած տարբեր ազգությունների ներկայացուցիչները հանդիսանում են Թուրքիայի սփյուռքը և Թուրքիան անելու է ամենը, որ նրանք կրկին վերադառնան իրենց ծննդավայրերը:

Բոստանջն էլ, նախարարին ի պատասխան, գոհունակություն է հայտնել կրկին իր ծննդավայրում գտնվելու կապակցությամբ և ասել է, որ իրեն չի համարում Թուրքիայի սփյուռք, քանի որ Թուրքիայում է ծնվել, մեծացել և բանակ գնացել: Հայ երաժիշտն ասել է նաև, որ գտնվելով արտերկրում, միշտ հոգեպես գտնվել է իր ծննդավայրի հետ և կրկին հաստատել, որ չի պատրաստվում այլևս իր ծննդավայրից դուրս գալ:

Ermenihaber.am