Դավութօղլու. «Առանց ղարաբաղյան խնդրի խաղաղ ճանապարհով լուծման, Հարավային Կովկասում կայունության հասնելն անհնար է»

Քաղաքական11:21, 15 Օգոստոս 2013

Դավութօղլու. «Առանց ղարաբաղյան խնդրի խաղաղ ճանապարհով լուծման, Հարավային Կովկասում կայունության հասնելն անհնար է»

Թուրքիայի արտգործնախարար Ահմեթ Դավութօղլուն Ադրբեջանի Գաբալա քաղաքում կազմակերպված թյուրքալեզու երկրների գործարար համագործակցության խորհրդի գագաթնաժողովին հանդես է եկել ելույթով: Նա նախ շնորհավորել է Ադրբեջանին թյուրքալեզու երկրների համագործակցության ֆորումի նախագահությունը ստանձնելու կապակցությամբ և մաղթել աշխատանքային հաջողություններ: Այդ կառույցի ստեղծումն ու գործումը Դավութօղլուն գնահատել է որպես պատմական նշանակության զարգացում:

Դավութօղլուն անդրադարձել է նաև ղարաբաղյան հակամարտությանը: Նա մասնավորապես ասել է. «Ցավալի է, որ գրեթե 20 տարի ընթացող բանակցություններն արդյունք չեն տվել: Առանց Լեռնային Ղարաբաղի խնդրի խաղաղ ճանապարհով լուծման, Հարավային Կովկասում և Միջին Ասիայում կայունության, բարօրության հասնելն անհնար բան է դառնում: Այդ պատճառով Լեռնային Ղարաբաղի հարցը պետք է լուծվի միջազգային իրավունքի շրջանակներում, իսկ Ադրբեջանի տարածքային ամբողջականության, ինչպես նաև Ադրբեջանի «գրավյալ» տարածքերի ազատագրման համար Թուրքիան իր ուժերի ներածին չափով շարունակելու է աջակցել»:

Ermenihaber.am