Թուրքիան չի հրաժարվել Արաքսի վրա ջրամբար կառուցելու պլաններից

Տնտեսական14:10, 19 Օգոստոս 2013

Թուրքիան չի հրաժարվել Արաքսի վրա ջրամբար կառուցելու պլաններից

Թուրքիայի ազգային մեծ ժողովի (ԹԱՄԺ-TBMM) պատգամավոր Էրքան Աքչայը խորհրդարանի ամբիոնից հարց է ուղղել անտառների և ջրային պաշարների նախարար Վեյսել Էրօղլուին այն մասին, թե հայ-թուրքական սահմանով անցնող Արաքս (Արազ, Երասխ) գետի վրա նախատեսված ջրամբար կառուցումն ինչ եղավ:

«Տեղեկություններ կան, թե Հայաստանին չվշտացնելու համար կյանքի չի կոչվել այդ ամբարտակի կառուցման նախագիծը»,- ըստ «Հաբեր10» լրատվական կայքի` հարցրել է թուրք խորհրդարանականը:

Նախարարն ի պատասխան ասել է, որ ստահոդ են այդ տեղեկությունները: Նա պարզաբանել է, որ ջրամբարի և հիդրոէլեկտրակայանի (ՀԷԿ) նախագիծը 2013 թվականի ներդրումային ծրագրերի փաթեթում է ներառված: Էրօղլուն նշել է, որ ջրամբարը մտադիր են կառուցել շինարարական ամբողջ ծավալով ու ամենասեղմ ժամկետներում: Եվ դրանով փորձելու են ապահովել Իգդիրի դաշտավայրի (70. 530 հա) ոռոգումը և Թուզլուջա շրջանի ՀԷԿ-ի էլեկտրաէներգիայի արտադրությունը:

Ermenihaber.am