Էրդողանի սկանդալային հայտարարությունը` կապված Իսրայելի հետ

Քաղաքական12:44, 20 Օգոստոս 2013

Էրդողանի սկանդալային հայտարարությունը` կապված Իսրայելի հետ

Թուրքիայի վարչապետ Ռեջեփ Թայիփ Էրդողանը Ստամբուլում կուսակիցների հետ հանդիպման ժամանակ սկանդալային հայտարարություն է արել: Ըստ թուրքական «Աքշամ» պարբերականի` կառավարության ղեկավարը «Արդարություն և զարգացում» կուսակցության կենտրոնակայանում գումարած ժողովում ելույթ ունենալով` ի թիվս այլ հարցերի, անդրադարձել է նաև եգիպտոսյան իրադարձություններին:

Էրդողանը հիշեցրել է 2011-ի ընտրությունների նախաշեմին Ֆրանսիայի հրեաներից մեկի ասած խոսքերն այն մասին, որ Եգիպտոսում «Մահմեդական եղբայրները» եթե անգամ հաղթեն ընտրություններում, միևնույն է, վերջնարդյունքում չեն հաղթանակելու, որովհետև ժողովրդավարությունը դա միայն ընտրությունները չեն:

«Ահավասիկ Արևմուտքի այն տրամաբանությունը, որ ժողովրդավարությունը դա ընտրությունները չեն, կամ միայն ընտրությունները չեն, հիմա նորից գործողության մեջ դնել ցանկացողներ կան: Այս պահին Եգիպտոսում հենց այդ տրամաբանությունն է օգտագործվում: Եգիպտոսում ի°նչ են ասում, ասում են. «Դեմոկրատիան քվեատուփը չէ»: Այս արտահայտության հետևում ի°նչ կա, Իսրայել կա: Մեր ձեռքին կան դրա ապացույցները»,- նշել է Էրդողանը` հավելելով. «Իսկ մենք ասում ենք, որ դեմոկրատիայի ճանապարհը ընտրություններով է անցնում: Քվեատուփը դա հենց ազգային կամքի դրսևորումն է»:

Ermenihaber.am