Ռուսաստանը փորձում է սաստել Ուկրաինային և Հայաստանին

Քաղաքական07:26, 21 Օգոստոս 2013

Ռուսաստանը փորձում է սաստել Ուկրաինային և Հայաստանին

Թուրքալեզու «Հաբերռուս» լրատվական կայքի խմբագիր Ֆարուք Աքքանն իր «Ի°նչու Ռուսաստանը Կիևի հետ գժտվեց, իսկ Բաքվի հետ գրկախառնվեց» հոդվածում անդրադարձել է ռուսական քաղաքականության տարածշրջանային էլեմենտներին:

«Այն ժամանակ, երբ աշխարհը խոսում է Եգիպտոսում տեղի ունեցող հեղաշրջման և որևէ կերպ ավարտին չհասնող Սիրիայի կոտորածների մասին, Մոսկվան միանգամից ռազմավարական երկու քայլ է կատարում. Ուկրաինայից ներմուծվող ապրանքների վրա խիստ հսկողություն է սահմանում, իսկ Ադրբեջանի հետ էլ Կովկասում մերձենալու քաղաքականություն է սկսում»,- նկատել է տալիս Աքքանը:

Այնուհետև նշում է, որ Մոսկվայի մտահոգությունն իրականում Եվրամիության «Արևելյան գործընկերություն» ծրագրի շրջանակներում Ուկրաինայի և Հայաստանի` ասոցացման պայմանագրի նախաստորագրման փուլին հասնելն է: Ի պատասխան դրա` Մոսկվան էլ խիստ հսկողության տակ է առել ուկրաինական ապրանքների ներմուծումը, որի շարունակության դեպքում Ուկրաինան մինչև տարեվերջ 3 մլրդ դոլարի վնաս կկրի: Իսկ Երևանին սաստելու համար Մոսկվան «գրկախառնվում է» Բաքվի հետ: Ահա թե ինչու նախագահ ընտրվելուց հետո Վլադիմիր Պուտինն առաջինն այցելեց ոչ թե Երևան, այլ Բաքու, որտեղ ստորագրվեցին էներգետիկ ու ռազմական ոլորտներում համագործակցելու վերաբերյալ մի շարք պայմանագրեր:

«Ռուսաստանը ջանում է հետխորհրդային տարածքի երկրներին հավաքել մաքսային միության և եվրասիական տնտեսական միության շրջանակներում և իր արտաքին քաղաքականությունը ու տնտեսական հեռանկարները այդ ուղղությամբ է առաջ մղում: Սակայն Ռուսաստանը դեռևս հստակ գիտակցություն ու պատկերացում չունի գործի դրվող այդ նոր ռամզավարության, դրա փորձարկումների ու ձախողումների մասին»,- եզրափակում է Աքքանը:

Ermenihaber.am