Թուրքիայի գլխավոր ընդդիմադիրը հանդիպել է Իրաքի վարչապետի հետ

Տարածաշրջան06:58, 22 Օգոստոս 2013

Թուրքիայի գլխավոր ընդդիմադիրը հանդիպել է Իրաքի վարչապետի հետ

Թուրքիայի գլխավոր ընդդիմադիր ուժի` «Ժողովրդահանրապետական կուսակցության» (ԺՀԿ-CHP) առաջնորդ Քեմալ Քըլըչդարօղլուն Բաղդադում հանդիպում է ունեցել Իրաքի վարչապետ Նուրի Էլ Մալիքիի և ազգային անվտանգության խորհրդի նախագահ Ֆալիհ Էլ Ֆեյյազի հետ: Թուրքական և իրաքյան պատվիրակությունների հանդիպումը տևել է մեկ ժամ: Այնուհետև Քըլըչդարօղլուն թուրք-իրաքյան հարաբերությունների թեմայով ելույթ է ունեցել Բաղդադի «Էլ Նահրեին» ռազմավարական հետազոտությունների կենտրոնում կազմակերպված կոնֆերանսում:

«ԺՀԿ» փոխնախագահ Ֆարուք Լողօղլուն, ով ներկա է գտնվել է Թուրքիայի գլխավոր ընդդիմադիրի և Իրաքի վարչապետի հանդիպմանը, որոշ մանրամասներ է ներկայացրել: Ըստ թուրքական «Բուգյուն» թերթի` հանդիպմանը կողմերը խոսել են այն անհրաժեշտությունից, որ Թուրքիան չպետք է խառնվի Իրաքի ներքին գործերին: Իրաքի վարչապետը հույս է հայտնել, որ «ԺՀԿ»-ն, որպես գլխավոր ընդդիմություն, իր հերթին կնպաստի, որ տարաձայնություններն Իրաքի ու Թուրքիայի միջև վերանան:

Լողօղլուն նշել է նաև, որ Մալիքիի հետ հանդիպամնը ներկա է եղել մի կին պատգամավոր, որը Գեզի զբոսայգու բողոքի ցույցերի վերաբերյալ հարցեր է տվել` անհանսգտություն հայտնելով, որ այդ ժամանակ արձանագրվել են մարդու իրավուքնների բազմաթիվ խախտումներ: Քեմալ Քըլըչդարօղլուն հաստատել է, որ մարդու իրավունքները բազմից խախտվել են Թուրքիայում:

Ermenihaber.am