Թուրքիայի «կանգնած մարդը» մրցանակ կստանա

Տարածաշրջան17:17, 27 Օգոստոս 2013

Թուրքիայի «կանգնած մարդը» մրցանակ կստանա

Թուրքական «Հաբեր 1» լրատվական կայքի հաղորդմամբ` վերջերս Թուրքիայում Գեզի այգու ծառահատումներն ու այնտեղ սկսված շինարարությունը կանխելու նպատակով սկսված ու լայնամասշտաբ բողոքի ալիքի վերաճած ցույցերի ժամանակ իրականացված «կանգնած մարդը» ակցիայի հեղինակ Էրդեմ Գյունդուզին Գերմանիայում մրցանակ կհանձնվի:

2005 թվականին Եվրոպացի լրագրողների կողմից հիմնված հեղինակավոր «M100 Sanssouci Colloquium» կազմակերպության մեդիա մրցանակը այս տարի կհանձնվի Ստամբուլի Գեզի այգու ու Թաքսիմ հրապարակի ցույցերի խորհրդանիշ դարձած «կանգնած մարդուն»:

Կազմակերպության հայտարարության մեջ նշվում է, որ մրցանակը Էրդեմ Գյունդուզին է հանձնվում, քանի որ նա իր «կանգնած մարդը» ակցիայով դարձել էր խաղաղ ցույցերի խորհրդանիշը և ամբողջ աշխարհում երկրպագուներ ձեռք բերել:

Հիշեցնենք, Գյունդուզը ճանաչում էր ձեռք բերել, երբ դուրս էր եկել Թաքսիմ հրապարակ և կանգնել Աթաթուրքի անվան մշակույթի կենտրոնի առաջ՝ դեմքով դեպի Հանրապետական Թուրքիայի հիմնադիր Քեմալ Աթաթուրքի նկարը։ Նա ժամերով անշարժ և լուռ կանգնել է՝ չարձագանքելով ոստիկաններին։ Շուտով մյուս ցուցարարները, նկատելով Գյունդուզի լուռ ակցիան, մեծ խմբերով միացել են նրան:

Նշենք, որ մեդիա մրցանակը, որը ամեն տարի տրվում է խոսքի ազատության զարգացման գործում նշանակալի ներդրում ունեցող գործչի, Գյունդուզին կհանձնվի սեպտեմբերի 5-ին Պոտսդամում:

Ermenihaber.am