Գեզիի դեպքերը խանգարեցին, որ 2020-ի օլիմպիադան Ստամբուլում անցկացվի

Մարզական10:22, 09 Սեպտեմբեր 2013

Գեզիի դեպքերը խանգարեցին, որ 2020-ի օլիմպիադան Ստամբուլում անցկացվի

Թուրքական մամուլն անհանգստություն է հայտնում, որ Արգենտինայում տեղադրվել են հակաթուրքական բնույթի ցուցապաստառներ: Մասնավորապես թուրքական «Հաբեր 3» էլեկտրոնային լրատվամիջոցը տեղեկացնում է, որ Արգենտինայի մայրաքաղաք Բուենոս Այրեսում գովազդային վահանակների մեջ կան այնպիսիները, որոնք 2020թ. օլիմպիական խաղերը Ստամբուլում անցկացնելու դեմ քարոզչություն են իրականացրել: Ցուցապաստառներում պատկերված է թուրք ուժային, որը մահակով հետապնդում է օլիմպիական մարզիկին: Այդ պաստառների վրա գրված է եղել. «Մարդու իրավունքները ոտնահարող երկրում օլիմպիադա չի կարող կազմակերպվել»:

Նշենք, որ 2020-ի Օլիմպիադան իրենց հարկի տակ ընդունելու համար պայքարում էին Ստամբուլը, Մադրիդը և Տոկիոն: Քվեարկության արդյունքներով հաղթել է Տոկիոն: Միջազգային օլիմպիական կոմիտեի 125-րդ նստաշրջանում ՄՕԿ-ի նախագահ Ժակ Ռոգգեն հայտարարել է, որ 2020 թվականի ամառային Օլիմպիական խաղերը կանցկացվեն Ճապոնիայի մայրաքաղաք Տոկիոյում:

Օլիմպիկական խաղերը Ստամբուլում չանցկացնելու հիմնական պատճառը, ըստ թուրքական մամուլում շրջանառվող վարկածի, ամռանը Գեզի զբոսայգու պահպանության շարժումից սկիզբ առած հակակառավարական լայնամասշտաբ բողոքի ակցիաներն են եղել և դրանց դեմ իշխանությունների կիրառած անհամաչափ ուժը:

Ermenihaber.am