ՔԲԿ-ն պաշտոնական հաղորդագրություն է տարածել զինյալների տարհանումը կասեցնելու կապակցությամբ

Տարածաշրջան14:06, 09 Սեպտեմբեր 2013

ՔԲԿ-ն պաշտոնական հաղորդագրություն է տարածել զինյալների տարհանումը կասեցնելու կապակցությամբ

Նախորդ շաբաթ Քրդական համայնքների միության կողմից տարածվել էր հայտարարությաուն, որում ասված էր հետևյալը. «Կառավարության կողմից քայլեր չձեռնարկելու համար զինյալների տարհանման գործընթացը դադարեցրել ենք: Հրադադարը շարունակվում է»:

Սակայն քրդական Խաղաղություն և ժողովրդավարություն կուսակցությունը հերքել էր այս տեղեկությունը` անվանելով այն ոչ պաշտոնական:

Թուրքական «Հաբերգազեթե» լրատվականի հաղորդմամբ` այսօր ի հայտ է եկել այդ պաշտոնական հաղորդագրությունը` Քուրդիստանի բանվորական կուսակցության (ՔԲԿ-PKK) և Քրդական համայնքների միության ստորագրությամբ (KCK), որտեղ նշված է, որ Նովրուզի տոնակատարություններից հետո սկսված զինյալների տարհանման գործընթացը կասեցված է:

Վերոնշյալ գործընթացի մասին լրագրողներին մեկնաբանություն է տվել նաև Թուրքիայի վարչապետ Ռեջեփ Թայիփ Էրդողանը: Նա ասել է, որ չի կարծում, թե գործընթացը լուրջ ճգնաժամ է ապրում: Նրա խոսքերով ամենակարևորն այն է, որ ժողովուրդը ցանկանում է, որ գործընթացը շարունակություն ունենա: Էրդողանն անդրադարձել է նաև ՔԲԿ-ի կողմից որոշ շրջաններում անվտանգության ջոկատներ կազմավորելու մասին խոսակցություններին` ասելով, որ կան այդպիսի հազվագյուտ դեպքեր, իսկ այդ մասին մամուլում շրջանառվող լուրերը չափազանցված են:

Գործընթացի վերաբերյալ առաջին մեկնաբանությունն է արել Քրդական ԽԺԿ-ի (Խաղաղություն և ժողովրդավարություն կուսակցություն) համանախագահ Գյուլթան Քըշանաքը` ասելով. «Պետք է ոչ թե բացասական բաներից խոսել այլ` հնարավորություններից: Հրադադարի պաշտոնապես շարունակվելը պետք է որպես հնարավորություն դիտարկել: Սա որպես մեկնակետ վերցնելով` պետք է հետագա առաջընթացի ուղի փնտրել: Կարծում եմ ՔԲԿ-ի կողմից գործընթացի դադարեցումը կարելի է հեշտորեն հաղթահարել»:

Քրդական Ժողովրդական հասարակական համագումարի (DTK) համանախագահ Ահմեթ Թուրքն էլ այս կապակցությամբ հայտարարությամբ հանդես գալով ասել է, որ, ՔԲԿ-ի կողմից տարհանման գործընթացի դադարեցումը դեռ ողջ գործընթացի մարում չի նշանակում:

Ermenihaber.am