Բահչելի. «Թուրքիան 5 անգամ եղել է թեկնածու և 5 անգամն էլ չի ընտրվել»

Մարզական13:47, 10 Սեպտեմբեր 2013

Բահչելի. «Թուրքիան 5 անգամ եղել է թեկնածու և 5 անգամն էլ չի ընտրվել»

«Գորշ գայլերի» քաղաքական թև հանդիսացող Թուրքիայի «Ազգայնական շարժում» կուսակցության (ԱՇԿ-MHP) առաջնորդ Դևլեթ Բահչելին կուսակցական ժողովում, ի թիվս Թուրքիային առնչվող վերջին զարգացումների, անդրադարձել է Ստամբուլի ձախողմանը, որը նպատակադրվել էր իր հարկի տակ ընդունել 2020թ. Օլիմպիադան:

Թուրքական «Վաթան» թերթի տեղեկացմամբ` Բահչելին ընդգծել է, որ նախկինում Թուրքիան 5 անգամ եղել է օլիմպիական խաղերը հյուրընկալելու թեկնածու, բայց ոչ մի անգամ հաղթող չի ճանաչվել: Վերջին անգամ էլ նախօրեին պարտություն արձանագրեց Արգենտինայում, որտեղ հայտարարվեց, որ Մադրիդ-Ստամբուլ-Տոկիո թեկնածու եռյակից 2020թ. Օլիմպիադայի համար ընտրվել է Ճապոնիայի մայրաքաղաքը:

Այն, որ տարբեր պատճառներ են շրջանառվում, թե ինչու օլիմպիական խաղերի համար Ստամբուլը չընտրվեց, Բահչելին երկրորդական է համարում: Ըստ նրա` Էրդողանն ու իր վարչակազմը շատ լավ էլ գիտեն իրական պատճառը ու թերությունը պետք է իրենց մեջ փնտրեն:

Նշենք, որ թուրքական մամուլում շրջանառվող հիմնական վարկածի համաձայն` Թուրքիան մերժվեց հյուրընկալել 2020թ. Օլիմպիադան Գեզիի ցույցերի ժամանակ ցուցարարների դեմ անհամաչափ ուժ կիրառելու և մարդու իրավունքները ոտնահարելու պատճառով: Մեկ այլ վարկածի համաձայն` ձախողման պատճառը Թուրքիային սահմանակից Սիրիայի քաղաքացիական պատերազմն է:

Ermenihaber.am