Թուրք հոդվածագիրը` Թուրքիայի, Հայաստանի ու Իսրայելի մասին

Քաղաքական07:32, 10 Սեպտեմբեր 2013

Թուրք հոդվածագիրը` Թուրքիայի, Հայաստանի ու Իսրայելի մասին

Թուրքական «Աքշամ» թերթի սյունակագիր Ֆիքրեթ Այդեմիրն իր հոդվածում ուշադրության է առել այն թեման, թե ինչպես է երբեմն առ երբեմն Թուրքիայի աշխարհագրական դիրքը եվրաինտեգրման կոնտեքստում քննարկման առարկա դառնում: Հոդվածագիրը նկատել է տալիս, որ «արդյոք Թուրքիան եվրոպական մայրցամաքի տարածքում է գտնվում» հարցադրումը երբեք չի հանվում օրակարգից:

«Նույնիսկ այն ժամանակ, երբ Եվրամիություն-Թուրքիա հարաբերությոuնները ամենից ջերմ շրջանն էին ապրում, եվրոպական կառույցներում և եվրահամայնքում դարձյալ քննարկվում էր Թուրքիայի աշխարհագրական դիրքը»,- գրում է Ֆիքրեթը:

Վերջինս Թուրքիայի հետ զուգահեռներ է անցկացնում Հայաստանի ու Իսրայելի օրինակները: Հոդվածագիրը ուշադրություն է հրավիրում այն իրողության վրա, որ օրինակ Հայաստանի ու Իսրայելի աշխարհագրական դիրքը կարծես երբեք քննարկման նյութ չի դառնում:

«Հայաստանը Թուրքիայի ամենաարևելյան հարևանն է, բայց կարողանում է վերջին տարիներին շատ ջերմ հարաբերություններ զարգացնել Եվրամիության հետ: Եվ ոչ ոքի մտքով չի անցել քննարկում բացել Հայաստանի աշխարհագրական դիրքի վերաբերյալ»,- նշում է թուրք հոդվածագիրը:

Նույնն էլ` Իսրայելը: Տարիներ շարունակ այդ երկիրը ներկայացնող արվեստագետները մասնակցում են «Եվրատեսիլ» երգի համաեվրոպական մրցույթին, մեկ անգամ էլ նույնիսկ հաղթող ճանաչվել, բայց ոչ ոք, ըստ Ֆիքրեթի, երբևէ չի հարցրել, թե արդյոք Իսրայելւ Եվրոպայում է գտնվում:

Վերջում հոդվածագիրը տարակուսանք է հայտնում, մի°թե այդ ամենը կարող է պատահականություն լինել:

Ermenihaber.am