Թուրք ոստիկանները հարձակվել են լրագրողների վրա, սպառնացել կրակել

Տարածաշրջան12:08, 11 Սեպտեմբեր 2013

Թուրք ոստիկանները հարձակվել են լրագրողների վրա, սպառնացել կրակել

Թուրք ոստիկանները սպառնալիքների ու ճնշման տակ են առնում իրենց աշխատանքը կատարող լրագրողներին: Այս մասին հայտնում է թուրքական «Ջումհուրիյեթ» օրաթերթը` իրազեկելով գիշերը Ստամբուլի Թաքսիմ հրապարակում տեղի ունեցած ցույցի ու ոստիկանների ուժային միջամտության մասին:

Դեպքի վայրում եղած «Ջումհուրիյեթ»-ի թղթակից Ալի Աչարը տեղեկացրել է, թե ինչպես են Ստամբուլի ոստիկանները մի լրագրողի ծեծի ենթարկել, իսկ մի ֆոտոլրագրողի էլ ձեռքերը ոլորել ու խոչընդոտել նրա աշխատանքը:

Ոստիկանության հատուկջոկատայինները քաշքշուքի մեջ են մտել օպերատորների ու լուսանկարիչների հետ` ջանալով կանխել տեսանկարահանումն ու լուսանկարումը: Նույն աղբյուրի համաձայն` լրագրողներից մեկը թևի շրջանում վնասվածք է ստացել ու գործընկերների օգնությամբ տեղափոխվել հիվանդանոց:

Նշվում է նաև, որ ոստիկաններից մեկը նույնիսկ զենքի փողն է ուղղել լրագրողի վրա և սպառնացել կրակել:

Ermenihaber.am