ԱՄՆ-Թուրքիա գաղտնի համաձայնագրի Հայաստանի վերաբերյալ դրույթը

Քաղաքական08:10, 16 Սեպտեմբեր 2013

ԱՄՆ-Թուրքիա գաղտնի համաձայնագրի Հայաստանի վերաբերյալ դրույթը

Թուրքիայի ներկայիս նախագահ Աբդուլլահ Գյուլի արտգործնախարար եղած ժամանակ Ամերիկայի Միացյալ Նահանգների հետ կնքված գաղտնի պայմանագրի կետերը հայտնի են դարձել լայն հանրությանը: Թուրքական «Միլլիյեթ» օրաթերթը հրապարակել է Գյուլի և այդ ժամանակվա ԱՄՆ պետքարտուղար Քոլին Փաուելի ստորագրությամբ 2003-ի հուլիսի 16-ին կնքված համաձայնագրի 9 դրույթները:

Ուշադրություն է հրավիրվում այն հանգամանքի վրա, թե ինչպես է Թուրքիայում իշխող «Արդարություն և զարգացում» կուսակցության օրոք կետ առ կետ կյանքի կոչվել նշյալ պայմանագրի հոդվածները:

Համաձայնագրի 9-րդ կետը վերաբերում է Հայաստան-Թուրքիա հարաբերությունների բարելավմանը: Նշված է, որ Անկարան կարգավորելու է իր հարաբերությունները Երևանի հետ, հայերի օգտին բարենպաստ պայմաններ է ստեղծելու սահմանային առևտուր իրականացնելու համար: Ըստ համաձայնագրի` հանվելու են որոշ սահմանափակումներ, որոնք կիրառվում էին Թուրքիայի որոշ շրջաններ այցելող հայերի համար:

«Բոլոր այդ նախապատրաստություններն օրակարգում են: Հայաստանի հետ օդային միջանցք է բացվել և Թուրքիայում անլեգալ աշխատելու պայմաններ են ստեղծվել Հայաստանի 70 հազար քաղաքացու համար»,- ընդգծում է պարբերականը:

Ermenihaber.am