Թուրքիայի նախագահը խոստովանեց. Գեզիում անհամաչափ ուժ է կիրառվել

Տարածաշրջան14:34, 25 Սեպտեմբեր 2013

Թուրքիայի նախագահը խոստովանեց. Գեզիում անհամաչափ ուժ է կիրառվել

Նյու-Յորքում գտնվող Թուրքիայի նախագահը, պատասխանելով լրագրողների հարցերին, խոստովանել է որ Գեզի զբոսայգու շուրջ ծավալվող իրադարձությունների ընթացքում ոստիկանության կողմից ցուցարարների նկատմամբ անհամաչափ ուժ է կիրառվել: Այս մասին հաղորդում է «CNNTurk»-ը:

Գյուլը մասնավորապես ասել է.

«Թուրքիայում ցույցերը սկզբում բնապահպանական բնույթ ունեին, ավելի ուշ, երբ արմատական ուժերը փորձեցին դրանք իրենց ձեռքը վերցնել և հասարակական կարգին վնաս հասցնել, ոստիկանությունը մրջամտեց: Երբեմն ուժի կիրառումը անհամաչափ է եղել, սակայն այս հարցում իրավական գործընթաց կա և որոշները նույնիսկ պատժվել են»:

Այն հարցին, թե ցույցերը արդյոք պառակտել են Թուրքիան, նա ասել է. «Չեմ կարծում, թե այս իրադարձությունը հասարակությանը երկատել է, որովհետև այս ցույցերին տասնյակ հազարավոր ցուցարարներ չեն մասնակցել: Գուցե Բեյօղլուում 100 հոգի մի գիշեր անվադող է այրել»:

Անդրադառնալով Սիրիայում հավանական ռազմական միջամտությանը` Գյուլն ասել է «Ռազմական միջամտությունը ծայրահեղ տարբերակն է: Անհրաժեշտ է դիվանագիտական ջանքեր գործադրել: Այս հարցում ամբողջ պատասխանատվությունն ԱՄՆ-ի վրա չէ: Հենց սկզբից էլ Սիրիայի հարցում լավ հաշվարկված ռազմավարական քաղաքականություն չի տարվել: Քաղաքական ռազմավարության մաս չկազմող ռազմական միջամտությունն արդյունք չի տա: Համապարփակ քաղաքական ռազմավարության անհրաժեշտություն կա»:

Ermenihaber.am