Սուլեյման Սոյլու. «Թուրքիայի նախագահ պետք է ընտրվի Էրդողանը»

Քաղաքական08:51, 09 Հոկտեմբեր 2013

Սուլեյման Սոյլու. «Թուրքիայի նախագահ պետք է ընտրվի Էրդողանը»

Թուրքիայում իշխող «Արդարություն և զարգացում» կուսակցության (ԱԶԿ-AKP) փոխնախագահ Սուլեյման Սոյլուն հյուրընկալվել է «Հաբեր թուրք» հեռուստաընկերությանը և եթերում պատասխանել օրախնդիր մի շարք հարցերի:

Խոսելով Թուրքիայի ներկայիս վարչապետ Ռեջեփ Թայիփ Էրդողանի` հանրապետության նախագահ ընտրվելու անհրաժեշտության և հնարավորության մասին` Սոյլուն մասնավորապես ասել է. «Նախագահական ամեն ընտրություններում մենք ճգնաժամ ենք ապրում: Հիմա առաջին անգամ պատմական շանս է ստեղծվել. Ժողովուրդն ինքն է ընտրելու նախագահին: Ժողովուրդը ցանկանում է, որ իշխանությունները մնան և շարունակեն: Թայիփ Էրդողանը պետք է նախագահ լինի:»:

Հիշեցնենք, որ մինչև այժմ Թուրքիայի նախագահի ընտրություններն անցկացվել են ոչ թե համաժողովրդական, այլ խորհրդարանական քվեարկությամբ: 2007-ի հոկտեմբերի 21-ին տեղի ունեցած հանրաքվեի ժամանակ ընտրողների մեծ մասը կողմ արտահայտվեց սահմանադրական փոփոխությունների օրենսդրական փաթեթին, համաձայն որի, երկրի նախագահին պետք է ընտրի ժողովուրդը: Իսկ նախագահի պաշտոնավարման ժամկետը նախկին 7 տարվա փոխարեն սահմանվեց 5 տարի ժամկետը` մեկ անգամ վերընտրվելու իրավունքով:

Ermenihaber.am