Իսրայել-Թուրքիա սկանդալի հետևում ԱՄՆ-Իրան մերձեցումն է

Քաղաքական10:33, 23 Հոկտեմբեր 2013

Իսրայել-Թուրքիա սկանդալի հետևում ԱՄՆ-Իրան մերձեցումն է

Իսրայելի ու Թուրքիայի միջև ծագող «հետախուզական» սկանդալը նոր երանգավորում է ստանում: Միջանկյալ նշենք, որ «Washington Post»-ի հայազգի սյունակագիր Դավիթ Իգնատիուսի հոդվածում oրերս մամուլում հայտնվեց տեղեկություն այն մասին, որ Թուրքիան օգնել է Թեհրանին բացահայտելԻսրայելի հետախուզության` Մոսսադի օգտին աշխատող 10 իրանցի լրտեսների ինքնությունը: Թուրքիան կտրականապես հերքել էր այդ տեղեկության իսկությունը, իսկ արտգործնախարար Ահմեթ Դավութօղլուն մեղադրել, որ հոդվածի հետևում կանգնած է Իսրայելը:

Եվրամիության ազդեցիկ դեմքերից մեկը, որի անունը, սակայն չի նշվում, ըստ թուրքական «Ջումհուրիյեթ» թերթի, ասել է, որ խնդիրը ոչ Էրդողանն է, ոչ էլ Թուրքիայի հետախուզության ղեկավար Ֆիդանը, խնդիրը Իրանն է:

«Այդ սկանդալի հետևում պետք է նկատել ԱՄՆ-Իրան մերձեցումը: Իսրայելը դա չի ցանկանում: Այստեղ հիմնական նպատակն Իրանն է: Իսրայելը դեմ է, որ ԱՄՆ-ն մերձենա Իրանի նախագահի հետ: Իսկ ԱՄՆ-ն ցանկանում է նրան շանս տալ»,- մեկնաբանել է եվրոպացի դիվանագետը:

Թուրքիայի վարչապետ Էրդողանի մասին դիվանագետն ասել է, որ Եվրոպայում նրան արդեն նայում են որպես իր լիդերության մեջ անկում ապրող գործիչ, որի վարած քաղաքականությունն աջակցություն չի ստանում ոչ ԱՄՆ-ի, ոչ Եվրոպայի կողմից:

Ermenihaber.am