Թուրք հոդվածագիր. «Էրդողանի հայտարարությունները համարձակ էին»

Տարածաշրջան14:35, 01 Նոյեմբեր 2013

Թուրք հոդվածագիր. «Էրդողանի հայտարարությունները համարձակ էին»

Թուրքական «Թարաֆ» թերթի հոդվածագիր Ջենգիզ Աքթարը «Ուրբաթօրյա գրառումներ» հոդվածում ի թիվս Թուրքիայում վերջին շրջանում կատարված իրադարձությունների անդրադարձել է նաև Ախթամարի հայկական եկեղեցու վերականգնման վերաբերյալ Էրդողանի արած հայտարարություններին:

Աքթարը մասնավորապես ասել է. «Վարչապետը երեկ Վանում պատմական խոսքեր ասեց: Պատասխանելով Դևլեթ Բահչելիի՝ (Ազգայնական շարժում կուսակցության նախագահ) «Ախթամարի եկեղեցին ազգի վճարած հարկերով է վերականգնվել» հայտարարությանը՝ Էրդողանը նշեց. «Մենք պաշտպանելու ենք և մուսուլմանի, և քրիստոնեայի, և հուդայականի ու նույնիսկ աթեիստի իրավունքները: Ես հայ ուղղափառ քաղաքացիներ ունե՞մ: Ունեմ: Արդյո՞ք այդ քաղաքացիների իրավունքները պաշտպանելը մեր պարտականությունը չէ: Արդյո՞ք իմ երկրի հայ քաղաքացիները հարկ չեն վճարում»:

Հոդվածագիրը համարձակության դրսևորում է որակավորում այս խոսքերը: Աքթարը Էրդողանի այս արտահայտությունները հավասար քաղաքացիության իրավունքի, կամքի ու դրանք գիտակցության մեջ կոնկրետացնելու ճանապարհին պատմական քայլ է անվանել: